హైదరాబాద్: బాలికపై వేధింపు, స్థానికుల దాడిలో యువకుడి మృతి

హైదరాబాద్‌లోని కుల్సుంపురలో బాలికపై వేధింపులకు పాల్పడిన వ్యక్తిపై స్థానికులు చేసిన దాడిలో ఆ యువకుడు మృతి చెందాడు.

అబ్దుల్ హజీజ్ (వయసు సుమారు 25) స్థానిక ఇందిరమ్మ డబుల్ బెడ్రూమ్ ఫ్లాట్‌లో నివసిస్తూ, నీలోఫర్ ఆసుపత్రి వద్ద టీ అమ్ముకుంటూ జీవిస్తున్నాడు. అదే కాలనీలో నాలుగో తరగతి చదువుతున్న ఓ బాలికతో అతను అసభ్యంగా ప్రవర్తించడాన్ని సీసీటీవీ కెమెరాలు రికార్డు చేశాయి. ఆ దృశ్యాలు చూసిన బాలిక తల్లిదండ్రులు, స్థానికులు ఆగ్రహించి అబ్దుల్ హజీజ్‌పై దాడి చేశారు.

తీవ్రంగా గాయపడిన అతడిని వెంటనే ఉస్మానియా ఆసుపత్రికి తరలించారు. చికిత్స పొందుతూ కొద్ది రోజులకు మృతి చెందాడు. పోలీసులు ఘటనపై కేసు నమోదు చేసి దర్యాప్తు ప్రారంభించారు. మృతుడి తల్లి మాట్లాడుతూ, "40-45 మంది కలిసి నా కొడుకును గదిలోకి లాగి చితకబాదారు, చేతులు విరగ్గొట్టారు" అని ఆరోపించారు. మరోవైపు ఉద్రిక్తతలు చెలరేగకుండా ప్రాంతంలో బందోబస్తు ఏర్పాటు చేశారు.