హిమాచల్ ప్రదేశ్‌లో పాత వంతెన కూలి ట్రక్ నదిలో పడింది; డ్రైవర్ అదృష్టవశాత్తు ప్రాణాలతో బయటపడ్డాడు

హిమాచల్ ప్రదేశ్ లోని కిన్నోర్ జిల్లాలో ఒక పాత ఇనుప వంతెన కూలిపోయింది. సట్లేజ్ నదిపై ఉన్న ఈ వంతెనపై నుంచి ఒక గ్రావెల్ ట్రక్ వెళ్తుండగా ఈ ఘటన జరిగింది.

ట్రక్కు వంతెన చివరి వరకు చేరుకోగానే వంతెన మధ్య భాగం కుప్పకూలడంతో ట్రక్ నదిలో పడిపోయింది. ట్రక్ డ్రైవర్ నదిలో పడినా, నీటి ప్రవాహం తక్కువగా ఉండడంతో ప్రాణాలతో బయటపడ్డాడు.

ఈ సమయంలో ఆ వంతెన వెనుక ఒక తెల్లటి కారు వస్తోంది. వంతెన కూలడం చూసి ఆ కారు డ్రైవర్ అప్రమత్తమై వంతెన ఎక్కకుండా ఆపాడు. దాంతో కారులోని వారు కూడా సురక్షితంగా ఉన్నారు.

ఈ ఘటనకు సంబంధించిన వీడియో సోషల్ మీడియాలో వైరల్ అయ్యింది. పాత వంతెనల భద్రతపై అధికారులు దృష్టి సారించాల్సిన అవసరం ఉందని ఈ సంఘటన గుర్తు చేస్తోంది. ఈ ప్రమాదంపై అధికారులు దర్యాప్తు చేపట్టారు.