రంగారెడ్డిలో ఆస్తి వివాదం: తండ్రిపై కుమారుడి దాడి, పోలీసుల దర్యాప్తు

రంగారెడ్డి జిల్లా రాజేంద్రనగర్ మండలంలోని ఉప్పరపల్లిలో ఆస్తి వివాదంలో తండ్రిపై కుమారుడు దాడి చేసిన ఘటన వెలుగులోకి వచ్చింది. అనంత రెడ్డి అనే వ్యక్తి తన చిన్న కుమారుడు ఓం రెడ్డిపై పోలీసులకు ఫిర్యాదు చేశారు.

అనంత రెడ్డి తనకున్న 31 కుంటల భూమిలో 300 గజాల స్థలం తన వృద్ధాప్యం కోసం ఉంచుకొని మిగతా భూమిని ఇద్దరు కుమారులకు సమానంగా పంచినట్లు ఫిర్యాదులో పేర్కొన్నారు. ఆ 300 గజాల స్థలాన్ని కూడా తన పేరున రాసివ్వాలని ఓం రెడ్డి ఒత్తిడి చేశాడని, ఈ క్రమంలో తనపై దాడి చేశాడని అనంత రెడ్డి తెలిపారు.

దాడి దృశ్యాలు వీడియో రూపంలో బయటకు వచ్చాయి. కుమారుడి నుంచి తనకు ప్రాణహాని ఉందని, చంపేస్తానని బెదిరిస్తున్నాడని అనంత రెడ్డి ఫిర్యాదులో ఆరోపించారు.

ఈ ఫిర్యాదుపై రాజేంద్రనగర్ పోలీసులు దర్యాప్తు ప్రారంభించారు. ఓం రెడ్డి స్పందనపై వివరాలు తెలియాల్సి ఉంది.