పలమనేరులో ఆపరేషన్ టస్కర్ విజయవంతం: ఒంటరి ఏనుగు సురక్షితంగా బంధనం

చిత్తూరు జిల్లా పలమనేరు ప్రాంతంలో అటవీ శాఖ చేపట్టిన ఆపరేషన్ టస్కర్ విజయవంతమైంది. గత ఆరు నెలలుగా జగమర్ల, పొంగనూరు, సోమల, బంగారుపాళెం, పీలేరు పరిసర ప్రాంతాల్లో సంచరిస్తూ ప్రజలకు భయం కలిగిస్తున్న ఒంటరి ఏనుగును అధికారులు సురక్షితంగా బంధించారు.

ఈ ఆపరేషన్‌లో కుంకీ ఏనుగులు కీలక పాత్ర పోషించాయి. తిరుపతిలోని ఎస్వీ జూ పార్క్ నుంచి గణేష్ అనే కుంకీ ఏనుగును తీసుకొచ్చి, ముందుగా క్యాంప్‌లో మిగతా కుంకీలతో కలిపి అలవాటు చేశారు. అనంతరం ఈ కుంకీల సహకారంతో ఒంటరి ఏనుగును పట్టుకునే వ్యూహం రూపొందించారు.

జగమర్ల సమీపంలో కుంకీ ఏనుగుల మకాం ఏర్పాటు చేసి, ఒంటరి ఏనుగును ఆకర్షించేందుకు ఆహారం ఉంచారు. మంగళవారం నుంచి అక్కడే ఉన్న కుంకీల వద్దకు బుధవారం ఒంటరి ఏనుగు చేరింది. వెంటనే అటవీ శాఖ సిబ్బంది అప్రమత్తమై, వైద్య పర్యవేక్షణలో దానికి మత్తు మందు ఇచ్చారు.

కుంకీ ఏనుగుల సాయంతో జాగ్రత్తగా టెంపో వాహనంలో ఎక్కించారు. ఎలాంటి ప్రమాదం లేకుండా పూర్తి భద్రతా చర్యలతో ఈ ఆపరేషన్ ముగిసింది. ప్రజలకు ఇబ్బందులు కలిగిస్తున్న ఈ ఏనుగును బంధించడంలో పలమనేరు కుంకీ ఏనుగులు, అటవీ శాఖ అధికారులు కీలకంగా పనిచేశారు.