పల్నాడు జిల్లాలో మెగా రుణ మేళా: 1.03 లక్షల మందికి ₹3,216 కోట్ల రుణాలు

పల్నాడు జిల్లాలో నేడు భారీ స్థాయిలో రుణాల పంపిణీ కార్యక్రమం జరగనుంది. నరసారావుపేటలోని కోడెల శివప్రసాద్ రావు స్టేడియంలో ఏర్పాటు చేసిన ఈ మెగా రుణ మేళాకు కేంద్ర ఆర్థిక మంత్రి నిర్మల సీతారామన్, ముఖ్యమంత్రి చంద్రబాబు నాయుడు ముఖ్య అతిథులుగా హాజరుకానున్నారు.

ఈ కార్యక్రమంలో జిల్లాలోని 1,03,246 మంది లబ్ధిదారులకు మొత్తం 3,216 కోట్ల రూపాయల రుణాలు మంజూరు చేయనున్నట్లు అధికారులు తెలిపారు. ఇందులో అత్యధికంగా వ్యవసాయ రంగానికి 83,365 ఖాతాలకు 2,286 కోట్లు కేటాయించగా, సూక్ష్మ, చిన్న తరహా పరిశ్రమలు, చేతివృత్తులవారి కోసం 4,412 ఖాతాలకు 313.19 కోట్ల రుణాలు అందించనున్నారు.

MUDRA, PM SVANidhi, PMEGP, PM Vishwakarma వంటి కేంద్ర ప్రభుత్వ పథకాల కింద ఈ రుణాలు మంజూరు చేస్తున్నట్లు వెల్లడించారు. అదేవిధంగా జిల్లాలోని 16 మండలాల్లో 52 కోట్ల పెట్టుబడితో 16 ఫుడ్ ప్రాసెసింగ్ యూనిట్ల ఏర్పాటుకు అనుమతి ఇచ్చారు.

ఇప్పటికే కార్యక్రమ ఏర్పాట్లను జిల్లా కలెక్టర్ కృతికా శుక్ల, ఆయా శాఖల అధికారులు సంయుక్తంగా పరిశీలించారు. భద్రతా ఏర్పాట్లను కూడా పర్యవేక్షించినట్లు అధికారులు తెలిపారు.