25 ఏళ్ల లగాన్ జ్ఞాపకాలు: కెప్టెన్ రస్సెల్‌గా నటించిన పాల్ బ్లాక్‌థార్న్ ప్రత్యేక ఇంటర్వ్యూ

‘లగాన్’ సినిమా విడుదలై 25 ఏళ్లు పూర్తయిన సందర్భంగా ఆ సినిమాలో కెప్టెన్ ఆండ్రూ రస్సెల్ పాత్ర పోషించిన బ్రిటిష్ నటుడు పాల్ బ్లాక్‌థార్న్ భారత్‌కు తిరిగి వచ్చారు. 2008 తర్వాత తొలిసారిగా ముంబైకి వచ్చిన ఆయన ఈ సినిమా షూటింగ్ అనుభవాలు, అమీర్ ఖాన్‌తో స్నేహం, అప్పటి కష్టాలు ఇండియా టుడేతో పంచుకున్నారు.

గుజరాత్‌లో జనవరి నుంచి ఏప్రిల్ వరకు జరిగిన షూటింగ్ సమయంలో తీవ్రమైన ఎండ, దుమ్ము దూళి, మిడుతల దాడులు వంటి సవాళ్లను ఎదుర్కొన్నామని పాల్ గుర్తుచేసుకున్నారు. ‘ప్రెషర్ కుక్కర్‌లా ఉండేది, ఒక్క క్రికెట్ మ్యాచ్ షూట్ చేయడానికే వారాల తరబడి పట్టింది. ఆదివారం మాత్రమే విశ్రాంతి దొరికేది, నేరుగా బీచ్‌కెళ్లి రీఛార్జ్ అయ్యేవాడిని’ అని ఆయన చెప్పారు. ఒకసారి కాస్ట్యూమ్ డిపార్ట్‌మెంట్‌లో దాక్కుని మూడు గంటలు నిద్రపోయానని, అది హీట్‌స్ట్రోక్‌గా మారిందని, గుర్రంపై ఫొటోలకు పోజులిస్తూ కిందపడిపోయానని నవ్వుతూ వివరించారు.

ఇక భోజనం విషయంలో మొదట్లో బొప్పాయి పాయసం, కూరలే అన్నీ ఇచ్చేవారని, బ్రిటిష్ నటీనటులు మార్పు కోరడంతో ‘పెన్నె పాస్తా’ తెచ్చారని, అయితే అందులోనూ కూర మసాలా ఉండటంతో అది ‘కర్రీ పాస్తా’గా మారిందని సరదాగా అన్నారు. తాను లండన్‌లో నాలుగు నెలలు హిందీ నేర్చుకున్నానని, కానీ డైలాగులు మాత్రం వినికిడి ద్వారా సహజంగా పలికించే ప్రయత్నం చేశానని, నటన అంటే కేవలం సంభాషణలు కాదు, ఎదుటివారిని వినడమే అనే తన నమ్మకాన్ని పాల్ తెలిపారు.

అమీర్ ఖాన్‌తో తన అనుబంధం గురించి మాట్లాడుతూ ‘అమీర్ గొప్ప మనసున్న వ్యక్తి, విపరీతమైన ఆతిథ్యం ఇచ్చే మనిషి, ఈ ఏళ్లలో లండన్, అమెరికా, ఇక్కడ కలుస్తూనే ఉన్నాం’ అన్నారు. 2002లో లగాన్ ఆస్కార్‌కు నామినేట్ అయినప్పుడు అమీర్ తనతో కలిసి హాలీవుడ్ హోటల్‌లో అకాడమీ సభ్యుల కోసం ప్రత్యేక ప్రదర్శన ఏర్పాటు చేసిన తీరును గుర్తుచేసుకున్నారు. ఈ సినిమా తన జీవితాన్ని మలుపు తిప్పిందని, దాంతో అమెరికన్ టీవీలో 20 ఏళ్ల పాటు పనిచేసే అవకాశం వచ్చిందని చెప్పారు. లగాన్‌లో నచ్చిన సన్నివేశం ఏంటని అడిగితే ‘భువన్ కచ్రాను రక్షించే దృశ్యం, అది చూస్తే ఇప్పటికీ కళ్లు చెమ్మగిల్లుతాయి’ అన్నారు. లగాన్‌-2 వస్తే నటిస్తారా అన్న ప్రశ్నకు ‘ఆఫ్రికాలో సినిమా తీయాల్సి వస్తుందేమో, నేను సిద్ధమే’ అని సరదాగా సమాధానం ఇచ్చారు.