శ్రీశైలం టైగర్ రిజర్వ్‌కు అదనపు పులులు, గోదావరి శుభ్రతకు కేంద్ర సాయం కోసం పవన్ కళ్యాణ్ విన్నపం

ఆంధ్రప్రదేశ్ ఉప ముఖ్యమంత్రి పవన్ కళ్యాణ్ కేంద్ర అటవీ, పర్యావరణ మంత్రి భూపేంద్ర యాదవ్‌తో ఢిల్లీలో సమావేశమయ్యారు. శ్రీశైలం టైగర్ రిజర్వ్‌లో ఆడపులుల సంఖ్య తక్కువగా ఉందని, జన్యు వైవిధ్యం తగ్గిపోతోందని చెప్పారు.

ఈ నేపథ్యంలో ఆరు పులులను కేటాయించాలని కోరారు. మహారాష్ట్ర నుండి నాలుగు పులులు, మధ్యప్రదేశ్ నుండి రెండు పులులు ఇవ్వడానికి ఆయా రాష్ట్ర ముఖ్యమంత్రులు అంగీకరించినట్టు తెలిపారు.

పార్వతీపురంలో మానవ-జంతు సంఘర్షణ నివారణకు ఒడిశా నుంచి శిక్షణ పొందిన కుంకి ఏనుగులను పంపాలని కోరగా, ఆ ముఖ్యమంత్రి మోహన్ చరణ్ మాంజీ సంసిద్ధత తెలిపారు.

‘మిషన్ గోదావరి’ పేరుతో నదీ శుభ్రతకు కేంద్రం సహాయం అందించాలన్నారు. భూపేంద్ర యాదవ్ సెంట్రల్ పొల్యూషన్ కంట్రోల్ బోర్డ్ బృందాన్ని పంపి కాలుష్య స్థాయిని పరిశీలించి నివారణ చర్యలు తీసుకుంటామని చెప్పారు.

ఏపీ తీరం 1051 కిలోమీటర్లు పొడవు ఉండగా, సముద్ర కోత నివారణకు మిస్టి పథకం నుంచి నిధులు కావాలని పవన్ కళ్యాణ్ అడిగారు. 450 కి.మీ. మేర పనులు ప్రారంభించామని, మిగతాకు నిధులు కావాలన్నారు. ఈ మేరకు నిధులు పంపిస్తామని మంత్రి హామీ ఇచ్చారు.

సుమారు 17 అంశాలు అడిగామని, అన్నింటికీ వెంటనే సానుకూల స్పందన లభించిందని పవన్ కళ్యాణ్ తెలిపారు. ముఖ్యమంత్రి చంద్రబాబు నాయుడు, ఎన్డీఏ కూటమి తరపున మంత్రికి ధన్యవాదాలు చెప్పారు.