దేశ ప్రజల ఆకాంక్షలు పెరిగాయి, కాంగ్రెస్ కూడా మోదీపై నమ్మకంతో ఉంది: ప్రధాని

ప్రధాన మంత్రి నరేంద్ర మోదీ మాట్లాడుతూ దేశ ప్రజల అంచనాలు, ఆకాంక్షలు విపరీతంగా పెరిగాయని, ఇది ప్రభుత్వంపై ప్రజల నమ్మకాన్ని తెలియజేస్తోందని అన్నారు. ఒక బహిరంగ సభలో ఆయన మాట్లాడుతూ ఒకప్పుడు రూ.5 లక్షల వరకు ఆదాయంపై పన్ను విధించేవారని, ఇప్పుడు రూ.12 లక్షల వరకు ఆదాయంపై ఎలాంటి పన్ను లేదని గుర్తు చేశారు. డ్రైవింగ్ లైసెన్స్, పాస్‌పోర్ట్ వంటి సేవలు గతంలో ఎంత కష్టంగా ఉండేవో ఇప్పుడు ప్రజలు మర్చిపోయారని, ప్రస్తుతం డ్రైవింగ్ లైసెన్స్ తీసుకోవడం సులభమైందని, పాస్‌పోర్ట్ సగటున మూడు రోజుల్లోనే లభిస్తోందని వివరించారు.

ప్రజల అంచనాలు పెరగడం సహజమేనని, ఇది అసంతృప్తి కాదని మోదీ చెప్పారు. గతంలో కొత్త రోడ్డు కావాలని కోరిన వారు ఇప్పుడు మెట్రో రైలు ఎప్పుడు వస్తుందని అడుగుతున్నారని, ట్రైన్ సమయానికి రావడంతో సంతృప్తి చెందకుండా తమ రూట్లో వందే భారత్ ఎక్స్‌ప్రెస్ ఎందుకు రావడం లేదని ప్రశ్నిస్తున్నారని ఉదాహరణగా చెప్పారు. ప్రజల ఈ ఆకాంక్షలే బీజేపీ, ఎన్డీఏ ప్రభుత్వాలకు శక్తినిస్తున్నాయన్నారు.

కాంగ్రెస్ పార్టీ కూడా తనపై నమ్మకం ఉంచుతోందని మోదీ వ్యాఖ్యానించారు. “సాధారణ ప్రజలే కాదు, మొత్తం కాంగ్రెస్ పార్టీ కూడా ‘మోదీ జీ, ఇది జరగాలి, అది జరగాలి’ అని అంటూనే ఉంటుంది. వాళ్లకు నమ్మకం ఉంది, చేస్తే ఇతనే చేస్తాడని” అని ఆయన అన్నారు. సామాన్యులు, మధ్య తరగతి, యువత తమ కలలు సాకారం అవుతాయనే నమ్మకంతో ఉన్న చోటే ఇలాంటి ఆకాంక్షలు పుడతాయని మోదీ తెలిపారు. ప్రజల పెరుగుతున్న అంచనాలు ప్రభుత్వంపై విశ్వాసానికి నిదర్శనమని, తాను వాటిని ఆశీర్వాదంగా భావిస్తున్నట్టు చెప్పారు.