అనకాపల్లి జిల్లా కాశింకోటలో 60 కేజీల గంజాయి స్వాధీనం

అనకాపల్లి జిల్లా కాశింకోట మండలంలోని జాతీయ రహదారిపై పోలీసులు 60 కేజీల గంజాయిని స్వాధీనం చేసుకున్నారు. డీఎస్పీ మోహన్ తెలిపిన వివరాల ప్రకారం, వాహన తనిఖీలు నిర్వహిస్తుండగా అనుమానాస్పదంగా వెళ్తున్న ఆటోను ఆపి చూడగా సీట్ల కింద 30 గంజాయి ప్యాకెట్లు కనిపించాయి. ఒక్కో ప్యాకెట్ బరువు 2 కేజీలు ఉండడంతో మొత్తం 60 కేజీల వరకు ఉన్నట్లు అధికారులు గుర్తించారు.

పోలీసులు ఆటోతో పాటు రెండు బైక్‌లు, నాలుగు మొబైల్ ఫోన్లు కూడా స్వాధీనం చేసుకున్నారు. నిందితులు నలుగురిని అదుపులోకి తీసుకున్నారు. ఆటో డ్రైవర్‌గా గుంత హేమంశుశేఖర్, లీడ్ బైక్‌లు నడుపుతూ పైలట్లుగా వ్యవహరించిన కారాకేశరి, గోబేరు వెంకట చైతన్యలతో పాటు ఈ స్మగ్లింగ్‌కు నిధులు సమకూర్చిన గాడి రత్నరాజు (పిఠాపురం)ను అరెస్టు చేశారు.

పోలీసులు ముందుగా సమాచారం మేరకు మఫ్టీలో ఉండి వాహన తనిఖీలు మరింత ముమ్మరం చేశారు. అనకాపల్లి ఎస్పీ ఆదేశాలతో ఈ చర్యలు చేపట్టినట్లు డీఎస్పీ చెప్పారు. మరో నిందితుడు మర్రి ఘాషి వరిస్సా (కోరాపాడి, రాళ్ళగడ్డ) పరారీలో ఉండగా అతని కోసం ప్రయత్నాలు కొనసాగుతున్నట్లు తెలిపారు.