ఆర్టీసీ 32 డిమాండ్లపై 14 గంటల సమీక్ష; 29 యాజమాన్యానికి, 3 ప్రభుత్వానికి: మంత్రి పొన్నం

రవాణా శాఖ మంత్రి పొన్నం ప్రభాకర్ ఆర్టీసీ కార్మికుల 32 డిమాండ్లపై సుదీర్ఘ సమీక్ష నిర్వహించారు. ఈ సమీక్ష 14 గంటలపాటు కొనసాగింది. ఇందులో 15 కార్మిక సంఘాల నుంచి ఇద్దరు చొప్పున 30 మంది ప్రతినిధులు పాల్గొన్నారు. సమావేశంలో ఏకగ్రీవంగా నిర్ణయాలు తీసుకున్నట్లు మంత్రి తెలిపారు.

డిప్యూటీ సీఎం భట్టి విక్రమార్క ఆధ్వర్యంలో జరిగిన ఈ సమీక్షలో మంత్రులు శ్రీధర్ బాబు, వివేక్ వెంకటస్వామి, అడ్లూరి, సీఎస్ రామకృష్ణరావు, ఫైనాన్స్ సెక్రటరీ సందీప్ కుమార్ సుల్తానియా, రవాణా శాఖ సెక్రటరీ వికాస్ రాజ్, లేబర్ సెక్రటరీ దానా కిషోర్, ఆర్టీసీ ఎండీ నాగిరెడ్డి సహా ఉన్నతాధికారులు హాజరయ్యారు.

32 డిమాండ్లలో 29 అంశాలు యాజమాన్యం పరిధిలో ఉండగా, మూడు అంశాలు ప్రభుత్వ పరిధిలో ఉన్నాయని మంత్రి వివరించారు. యాజమాన్యం పరిధిలోని 29 అంశాల పరిష్కారానికి ఈడీఐ కమిటీ ద్వారా చర్యలు తీసుకుంటున్నట్లు తెలిపారు.

ప్రభుత్వ పరిధిలోని మూడు అంశాలు: గుర్తింపు సంఘాల ఎన్నికలు, 2021 పీఆర్సీ, ఆర్టీసీ విలీనం. 2021 పీఆర్సీలో ప్రభుత్వం ప్రకటించిన 11% పెంపు జూలై నెల జీతాల నుండి అమలుకానుందని మంత్రి చెప్పారు. ఆర్టీసీ విలీన కమిటీలో కార్మిక ప్రతినిధులు తప్పనిసరి అని కార్మికులు ఏకగ్రీవంగా నిర్ణయించారు. ఆ ప్రతినిధులు గుర్తింపు పొందిన సంఘాలకు చెందినవారై ఉండాలన్న నిర్ణయం తీసుకున్నట్లు మంత్రి తెలిపారు.

దీని కోసం ముందుగా గుర్తింపు సంఘాల ఎన్నికలు నిర్వహించాల్సి ఉండటంతో ప్రభుత్వం ఎన్నికల ప్రక్రియను ప్రారంభించింది. లేబర్ జాయింట్ కమిషనర్ సునీతను ఎన్నికల నోడల్ అధికారిగా నియమించారు. త్వరలో ఎన్నికల షెడ్యూల్ విడుదల చేస్తారు.

కొంతమంది కార్మిక సంఘాల నాయకులు వాస్తవాలను వక్రీకరిస్తున్నారని మంత్రి పొన్నం విమర్శించారు. వారు కార్మికులను, ప్రజలను తప్పుదోవ పట్టించే ప్రయత్నం చేయటం బాధాకరమన్నారు. ఇతర కార్మిక సంఘాల నుంచి ఈ విషయంపై స్పందన రావాల్సి ఉంది.