కొబ్బరి తోటలో గోంగూర సాగుతో అదనపు ఆదాయం – ప్రకాశం రైతు విజయం

ప్రకాశం జిల్లా కొత్తపట్నం మండలం మడనూరు గ్రామానికి చెందిన రైతు రెహ్మాన్ బాషా తన రెండు ఎకరాల 20 సెంట్ల కొబ్బరి తోటలో ఖాళీ స్థలాన్ని ఆదాయంగా మార్చుకున్నారు. ఆయన కొబ్బరి మొక్కల మధ్య మామిడి, నిమ్మ మొక్కలతో పాటు గోంగూరనూ అంతర పంటగా సాగు చేస్తూ అదనపు లాభాలు పొందుతున్నారు.

రెండేళ్ల క్రితం కొబ్బరి మొక్కలు నాటిన తర్వాత మధ్యలో ఖాళీగా ఉన్న భాగంలో కలుపు మొక్కలు ఎక్కువగా పెరుగుతున్నాయి. ఈ సమస్యనే అవకాశంగా మార్చుకుని ఆయన గోంగూర విత్తనాలు నాటారు. తక్కువ పెట్టుబడి, 40 రోజుల్లోనే కోతకు వచ్చే ఈ పంట ఇప్పుడు నిరంతర ఆదాయ వనరుగా మారింది.

గోంగూర పంట కోతకు వచ్చిన వెంటనే స్థానిక వ్యాపారులు పొలం వద్దకే వచ్చి హోల్సేల్‌గా కొనుగోలు చేస్తున్నారు. దీంతో రవాణా ఖర్చు, మార్కెట్ కమీషన్ల ఇబ్బందులు లేకుండా సులభంగా డబ్బు అందుతోంది. 50 కేజీల బ్యాగుకు రూ.25 వేల నుంచి రూ.30 వేల వరకు ధర లభిస్తుండగా, ఎకరాకు సగటున రూ.60 వేల వరకు అదనపు ఆదాయం వస్తుందని రైతు తెలిపారు.

రసాయన ఎరువులు పూర్తిగా వాడకుండా ఘనజీవామృతం, జీవామృతం, చేప కషాయం వంటి సేంద్రియ పద్ధతులతో ఆయన అన్ని పంటలనూ సాగు చేస్తున్నారు. పంటలో దోమలు ఎక్కువగా ఉండటంతో ఎల్లో, బ్లూ స్టిక్కీ ప్లేట్లు ఏర్పాటు చేసి చీడపీడల నివారణ చేస్తున్నారు.

ఏక పంట సాగుతో నష్టాలు ఎదుర్కొనే రైతులకు ఈ విధానం ఒక మంచి ఆదర్శంగా నిలుస్తుంది. వ్యవసాయాధికారుల సూచనలతో పాటు తన స్వయంకృషితో రెహ్మాన్ బాషా తన పొలాన్ని లాభసాటిగా మార్చుకున్నారు. ప్రధాన పంటతో పాటు స్వల్పకాలిక పంటలు సాగు చేయడం ద్వారా ఖర్చులు తగ్గి ఆదాయం పెరుగుతుందని ఆయన అనుభవం చాటుతోంది.