గాయకుడు రాహుల్ సిప్లిగంజ్‌పై విశాఖలో యువతి ఫిర్యాదు; బెదిరింపు, బ్లాక్‌మెయిల్ ఆరోపణలు

విశాఖపట్నంలో గాయకుడు రాహుల్ సిప్లిగంజ్‌పై ఓ యువతి పోలీసులకు ఫిర్యాదు చేసింది. తనను బెదిరించారని, బ్లాక్‌మెయిల్ చేశారని ఆమె ఆరోపించింది.

ఈ ఫిర్యాదులో సిప్లిగంజ్ బంధువు రాహుల్ రెడ్డిని ప్రధాన నిందితుడిగా చూపారు. రాహుల్ రెడ్డి తనను పెళ్లి చేసుకుంటానని నమ్మించి శారీరకంగా వాడుకున్నాడని, ఆ తర్వాత ముఖం చాటేశాడని యువతి ఆరోపించింది. గతేడాది జూలైలో రాహుల్ రెడ్డి పరిచయం అయిన తర్వాత గర్భం దాల్చగా, ఈ ఏడాది జనవరిలో అతని ఒత్తిడితో అబార్షన్ చేయించుకున్నట్టు ఆమె ఫిర్యాదులో పేర్కొంది.

మార్చి 10న విశాఖ పోలీస్ కమిషనర్‌కు రాహుల్ రెడ్డిపై మాత్రమే ఫిర్యాదు ఇచ్చిన ఈ యువతి, మే నెలలో సిప్లిగంజ్, యశస్వని రెడ్డి, విగ్నేష్, హరిణ్య రెడ్డి తనను బెదిరించారని అదనపు ఆరోపణలు చేసింది. నేరపూరిత కుట్ర, బెదిరింపు, సైబర్ హింస, పరువు నష్టం, బ్లాక్‌మెయిల్, వ్యక్తిగత స్వేచ్ఛకు విఘాతం, ప్రాణాలకు ముప్పు, దోపిడీ వంటి సెక్షన్ల కింద కేసు నమోదు చేయాలని కోరింది. అంతేగాక, సిప్లిగంజ్ బంధువులు తనపై వ్యభిచారం, హనీ ట్రాప్, ఎయిడ్స్ బాధితురాలిగా తప్పుడు ప్రచారం చేశారని ఆరోపించింది.

ఈ కేసులో పోలీసులు రాహుల్ సిప్లిగంజ్‌కు నోటీసులు జారీ చేశారు. ఆయనను విచారణకు పిలిచే అవకాశం ఉంది.