తెలంగాణకు మూడు రోజుల వర్ష సూచన: వాతావరణ శాఖ హెచ్చరిక

తెలంగాణలో మరో మూడు రోజుల వరకు వర్షాలు కురిసే అవకాశం ఉందని వాతావరణ శాఖ అధికారులు హెచ్చరిక జారీ చేశారు. ఈ రోజు కొన్ని జిల్లాల్లో ఒకటి లేదా రెండు చోట్ల భారీ వర్షాలు పడే అవకాశం ఉందని తెలిపారు.

ఆదిలాబాద్, ఆసిఫాబాద్, మంచిర్యాల, రంగారెడ్డి, హైదరాబాద్, మేడ్చల్, వికారాబాద్, సంగారెడ్డి, మహబూబ్‌నగర్ జిల్లాల్లో వర్షాలు కురుస్తాయని అలర్ట్ ఇచ్చారు. ఉరుములు, మెరుపులు, ఈదురుగాలులతో కూడిన వర్షాలు రాష్ట్రంలోని అన్ని జిల్లాల్లో అక్కడక్కడా కురిసే అవకాశం ఉంది.

ప్రస్తుతం రాష్ట్రంలో పలు జిల్లాల్లో తేలికపాటి నుంచి మోస్తరు వర్షాలు పడుతున్నాయి. జూన్ నెలలో సాధారణం కంటే తక్కువ వర్షపాతం నమోదు కావడంతో, రాష్ట్రవ్యాప్తంగా 30% వర్షపాత లోటు కొనసాగుతోంది.

జూలై నెలలో పడే వర్షాలపైనే ఈ లోటు భర్తీ ఆధారపడి ఉంటుందని అధికారులు వివరించారు. బంగాళాఖాతంలో అల్పపీడనం ఏర్పడితే భారీ వర్షాలు కురిసే అవకాశం ఉందని, లేకపోతే అడపాదడపా వర్షాలకే పరిమితమయ్యే ప్రమాదం ఉందని తెలిపారు.

శ్రీశైలం, గోదావరి బేసిన్ ప్రాజెక్టులకు ప్రస్తుతం ఇన్‌ఫ్లో లేదు. దీంతో రిజర్వాయర్లు ఖాళీగా ఉన్నాయి. మహారాష్ట్రలోని పశ్చిమ కనుమల్లో వర్షాలు కురిస్తేనే కృష్ణా నదికి వరద వచ్చే అవకాశం ఉందని అధికారులు పేర్కొంటున్నారు. జూలై మధ్యలో లేదా ఆగస్టు నుంచి ఇన్‌ఫ్లో మొదలయ్యే అవకాశం ఉందని వాతావరణ శాఖ అంచనా వేస్తోంది.