రాజేంద్రనగర్‌లో బైక్ దొంగతనాలు: ఇద్దరు అరెస్టు, 10 వాహనాలు స్వాధీనం

హైదరాబాద్ రాజేంద్రనగర్ పోలీసులు టూ వీలర్ దొంగతనాలకు పాల్పడుతున్న ఇద్దరు యువకులను అరెస్టు చేశారు. నిందితుల నుంచి మొత్తం 10 బైకులు, స్కూటర్లను స్వాధీనం చేసుకున్నారు.

నిందితులు బిల్లకంటి ప్రసాద్ రావు అలియాస్ బండి, రాచర్ల అఖిల్. ఇద్దరూ కాలేజ్ విద్యార్థులు, మోచి కాలనీకి చెందిన వారు. ఈ నెల 13న బండ్లగూడా జాగీర్ ఎక్స్ రోడ్ దగ్గర పోలీసులు వాహనాల తనిఖీలు చేస్తుండగా వీరిద్దరిని ఆపి విచారించారు. వారు ప్రయాణిస్తున్న Yamaha RX 135 బైక్ దొంగిలించినదని తనిఖీలో తేలింది. స్టేషన్‌కు తీసుకెళ్లి విచారించగా నగరంలోని పలు ప్రాంతాల్లో వాహనాలు దొంగిలించినట్లు ఇద్దరూ అంగీకరించారు.

స్వాధీనం చేసుకున్న వాహనాల్లో Suzuki 125, Yamaha RX 100, Yamaha RX 135, KTM Duke 200, Pulsar NS 200 బైకులు ఉన్నాయి. ఒక కొత్త Pulsar NS 200 బైక్, ఒక ఎలక్ట్రిక్ వాహనం కూడా వీటిలో ఉన్నాయి. నేరాలకు ఉపయోగించినట్లు భావిస్తున్న River ఎలక్ట్రిక్ స్కూటర్‌ను కూడా పోలీసులు సీజ్ చేశారు.

విచారణలో కీలక విషయం బయటపడింది. ప్రధాన నిందితుడి స్నేహితుడి Pulsar NS 200 బైక్ ప్రమాదంలో డ్యామేజ్ అయింది. దాని రిపేర్ల కోసం అతను ₹70,000 అప్పు చేశాడు. ఆ అప్పు తీర్చలేకపోవడంతో పాటు వ్యక్తిగత ఖర్చుల కోసం సులభంగా డబ్బు సంపాదించాలనే ఉద్దేశంతో ఇద్దరూ దొంగతనాలకు పాల్పడినట్లు పోలీసులు తెలిపారు.

ఈ ఘటనకు సంబంధించి రాజేంద్రనగర్ పోలీస్ స్టేషన్‌లో కేసులు నమోదయ్యాయి. నిందితులను కోర్టులో హాజరుపరిచి, కోర్టు ఆదేశాలతో రిమాండ్‌కు తరలించారు. 10 టూ వీలర్లను రికవరీ చేసిన రాజేంద్రనగర్ పోలీసులను రాజేంద్రనగర్ జోన్ DCP అభినందించారు.