యునెస్కో రామప్ప ఆలయం పక్కనే ఓపెన్ కాస్ట్ మైనింగ్ ప్రతిపాదనపై ఆందోళన

ములుగు జిల్లా వెంకటాపూర్ మండలం పాలంపేట సమీపంలో సింగరేణి కాలరీస్ ఓపెన్ కాస్ట్ బొగ్గు గని తవ్వకాల ప్రతిపాదన ఆందోళనకు దారితీసింది. యునెస్కో ప్రపంచ వారసత్వ కట్టడమైన రామప్ప దేవాలయం ఈ ప్రతిపాదిత గని ప్రాంతానికి సమీపంలో ఉంది.

పర్యావరణ నిపుణులు, భూగర్భ శాస్త్రవేత్తలు, స్థానిక ప్రజలు ఈ తవ్వకాలు ప్రారంభమైతే రామప్ప ఆలయం, దాన్ని ఆనుకున్న చెరువుకు తీవ్ర ప్రమాదం ఏర్పడే అవకాశం ఉందని హెచ్చరిస్తున్నారు. ఓపెన్ కాస్ట్ మైనింగ్ 300 మీటర్ల లోతు వరకు చేపట్టే ప్రతిపాదన ఉంది. ఈ లోతు తవ్వినప్పుడు భూమిలో పగుళ్లు వచ్చి రామప్ప చెరువు నీరు లీకయ్యే ప్రమాదం ఉందని, సాండ్ బాక్స్ టెక్నాలజీతో నిర్మించిన ఆలయం పునాది బలహీనపడి కూలిపోయే ప్రమాదం ఉందని నిపుణులు చెబుతున్నారు.

గతంలో ఇదే రకమైన ప్రతిపాదనలు 2012, 2014లో వచ్చినప్పుడు, అప్పటి ముఖ్యమంత్రి కె. చంద్రశేఖర్ రావు ప్రభుత్వం వాటిని తిరస్కరించింది. 2021 మార్చిలో జరిగిన సమావేశంలో సింగరేణి ‘నో అబ్జెక్షన్ సర్టిఫికేట్’ కోరగా, కేసీఆర్ సర్కారు ఆ ప్రతిపాదనను పక్కన పెట్టింది. ఆ తర్వాతి జూలై 2021లో రామప్ప ఆలయానికి యునెస్కో ప్రపంచ వారసత్వ హోదా లభించింది.

తాజాగా రేవంత్ రెడ్డి ప్రభుత్వం ఓపెన్ కాస్ట్ మైనింగ్ ప్రతిపాదనను పరిశీలిస్తోందని, సానుకూలంగా స్పందించిందని స్థానిక వర్గాల సమాచారం ప్రకారం తెలుస్తోంది. అయితే, ఈ విషయంలో ప్రభుత్వం అధికారికంగా ప్రకటన చేయాల్సి ఉంది. ప్రతిపక్షమైన బీఆర్ఎస్ పార్టీ, పర్యావరణ సంఘాలు ఈ ప్రతిపాదనను తీవ్రంగా వ్యతిరేకిస్తున్నాయి. తవ్వకాలు ప్రారంభిస్తే రామప్ప ఆలయం ఉనికి ప్రమాదంలో పడుతుందని, యునెస్కో గుర్తింపు కూడా కోల్పోయే అవకాశం ఉందని వారు ఆందోళన వ్యక్తం చేస్తున్నారు.