ప్లాస్టిక్ నోట్ల పైలట్‌ను ఆరంభించనున్న RBI: ₹10, ₹20 నోట్లతో మొదలు

రిజర్వ్ బ్యాంక్ ఆఫ్ ఇండియా (ఆర్‌బీఐ) దేశంలో పాలిమర్ (ప్లాస్టిక్) నోట్లను ప్రవేశపెట్టే ప్రక్రియను మొదలుపెట్టింది. అధికారిక వర్గాల సమాచారం ప్రకారం, తొలి పైలట్ రోల్ అవుట్ ₹10, ₹20 నోట్లతో ప్రారంభం కానుంది. ఈ పైలట్ ద్వారా పాలిమర్ కరెన్సీ పనితీరును అంచనా వేసిన తర్వాత వచ్చే ఏడాది దేశవ్యాప్తంగా పూర్తిస్థాయి విడుదలకు ఆర్‌బీఐ సిద్ధమవుతోంది. కొత్త పాలిమర్ నోట్లు ప్రస్తుతం చలామణిలో ఉన్న కాగితపు నోట్ల స్థానాన్ని పూర్తిగా తీసుకోవు; రెండు రకాల నోట్లు ఒకేసారి చలామణిలో ఉంటాయి.

ఈ కొత్త నోట్ల కోసం ప్రత్యేక సబ్స్ట్రేట్ షీట్లను సరఫరా చేసేందుకు ఆర్‌బీఐ నోట్ ముద్రణ విభాగం గ్లోబల్ టెండర్ పిలిచింది. ఈ టెండర్‌కు బిడ్ దాఖలు చేయడానికి ఆగస్టు 18 చివరి తేదీగా నిర్ణయించారు. పాలిమర్ సబ్‌స్ట్రేట్ షీట్లపై అధునాతన భద్రతా లక్షణాలు ఉండేలా ప్రత్యేక సాంకేతికత వాడడం వల్ల నకిలీ నోట్ల సృష్టిని సమర్థంగా అడ్డుకోవచ్చని అధికారులు చెబుతున్నారు. ఈ షీట్లను దిగుమతి చేసుకునే అవకాశం ఉంది.

పాలిమర్ నోట్లు కాగితపు నోట్లతో పోలిస్తే ఎక్కువ మన్నికైనవి, తడి, ధూళి నుంచి రక్షణ కల్పించేవి. ఆస్ట్రేలియా, బ్రిటన్ సహా అనేక దేశాలు ఇప్పటికే పాలిమర్ నోట్లను విజయవంతంగా వినియోగిస్తున్నాయి. ఆర్‌బీఐ ఈ పైలట్ ఫలితాల ఆధారంగా దేశానికి అవసరమైన స్థాయిలో నోట్ల ఉత్పత్తిని పెంచే ప్రణాళికలు సిద్ధం చేస్తోంది. ప్రస్తుతానికి రెగ్యులేటర్ ఈ విషయంపై అధికారిక వ్యాఖ్య చేయలేదు. ఆగస్టు 18 టెండర్ గడువు తర్వాత మరింత వివరాలు వెల్లడయ్యే అవకాశం ఉంది.