కాకినాడ జిల్లా పెద్దాపురం సబ్జైల్ నుంచి రిమాండ్ ఖైదీ పరారీ; అనకాపల్లి జిల్లాలో అరెస్ట్

కాకినాడ జిల్లా పెద్దాపురం సబ్జైల్ నుండి ఒక రిమాండ్ ఖైదీ పరారీ అయ్యాడు. బైక్ దొంగతనం కేసులో అరెస్టైన పోతుల సుందరం అనే వ్యక్తి జైలు నుండి తప్పించుకున్నాడు.

పోలీసులు వెంటనే స్పందించి, అనకాపల్లి జిల్లా పాయకరావుపేటలో అతన్ని అదుపులోకి తీసుకున్నారు. ఈ ఘటనతో జైలు భద్రతపై ప్రశ్నలు తలెత్తుతున్నాయి.

అర్ధరాత్రి వరకు జైలు సిసీ కెమెరాలను సిబ్బంది పరిశీలించారు. ఖైదీ ఎలా తప్పించుకున్నాడనే విషయం ఇంకా స్పష్టంకాలేదు. అతడు గోడ దూకి పారిపోయాడా, లేక జైలు సిబ్బందిలో ఎవరైనా సహకరించారా అనే కోణంలో పోలీసులు దర్యాప్తు చేస్తున్నారు.

గతంలోనూ ఇలాంటి ఘటనలు జరిగాయి. గత సెప్టెంబర్‌లో అనకాపల్లి జిల్లా చోడవరం సబ్జైల్ నుండి ఇద్దరు రిమాండ్ ఖైదీలు వార్డెన్‌పై దాడి చేసి పారిపోయారు. తర్వాత వారిని కూడా అరెస్టు చేశారు.

ప్రస్తుతం పెద్దాపురం ఘటనపై అధికారులు మరిన్ని వివరాలు వెల్లడించనున్నారు.