ఖమ్మంలో రైతు ఆశీర్వాద సభలో సీఎం రేవంత్ రెడ్డి ఈ-పట్టాదార్ పాస్ బుక్‌ల పంపిణీ

తెలంగాణ ముఖ్యమంత్రి రేవంత్ రెడ్డి ఈ రోజు ఖమ్మం జిల్లా చింతకాని మండలం జగన్నాథపురంలో రైతు ఆశీర్వాద సభలో పాల్గొని, అర్హులైన రైతులకు ఈ-పట్టాదార్ పాస్ బుక్‌లను అందజేస్తారు. ఈ సందర్భంగా రైతు భరోసా నిధుల విడుదల కార్యక్రమం కూడా కొనసాగుతుంది.

గత నెల 30వ తేదీన ఇదే ప్రాంతంలో మత్కేపల్లి క్రాస్ వద్ద ఈ సభ జరగాల్సి ఉండగా, వర్షాల కారణంగా రద్దయింది. దీంతో ఆ రోజు హైదరాబాద్‌లో నిధుల విడుదల చేశారు. ఆ తర్వాత వర్షాలు తగ్గడంతో, ఇప్పుడు తిరిగి సభ నిర్వహించాలని నిర్ణయించారు.

ఈ ఏర్పాట్ల కోసం 30 ఎకరాల స్థలంలో వేదిక, గ్యాలరీలు, ఎల్ఈడీ స్క్రీన్లు ఏర్పాటు చేశారు. లక్షలాది మంది రైతులు హాజరవుతారని అంచనా వేస్తున్నారు. లక్ష కుర్చీలు ఏర్పాటు చేయగా, 9000 వాహనాల కోసం 150 ఎకరాల పార్కింగ్ సౌకర్యం కల్పించారు.

జూన్ 30న ప్రారంభమైన వానాకాలం రైతు భరోసా పథకం కింద ఇప్పటికే తొమ్మిది రోజుల్లో 9,000 కోట్ల రూపాయలను రైతుల ఖాతాల్లో జమ చేసినట్లు ప్రభుత్వం తెలిపింది.