CM రేవంత్ రెడ్డి నేడు ఆసిఫాబాద్‌లో ఇందిరమ్మ ఇళ్ల రెండో విడత ప్రారంభం

తెలంగాణ ముఖ్యమంత్రి రేవంత్ రెడ్డి ఇవాళ కొమరంభీం ఆసిఫాబాద్ జిల్లా కొఠారి గ్రామంలో ఇందిరమ్మ ఇళ్ల రెండో విడత కార్యక్రమాన్ని ప్రారంభించనున్నారు. ఈ సందర్భంగా సీఎం పైలాన్ ఆవిష్కరించి, లబ్ధిదారులతో ముఖాముఖి నిర్వహించనున్నారు.

రెండో విడతలో రాష్ట్రవ్యాప్తంగా 2.5 లక్షల ఇళ్ల నిర్మాణం లక్ష్యంగా ప్రభుత్వం నిర్ణయించింది. సొంత స్థలం ఉన్న లబ్ధిదారులకు ఒక్కో ఇంటికి రూ.5 లక్షల చొప్పున నిధులు ఇవ్వనున్నారు. నియోజకవర్గానికి 1,500 కొత్త ఇళ్లు, 500 పెండింగ్ ఇళ్ల పూర్తికి నిధులు కేటాయించనున్నారు. గతంలో నిలిచిపోయిన ఇందిరమ్మ, గృహలక్ష్మి పథకాల ఇళ్లను పూర్తి చేయడానికి కూడా రెండో విడతలో నిధులు ఇవ్వాలని నిర్ణయించారు. అదనంగా, గుడిసల్లో ఉంటున్న 13,000 కుటుంబాలకు ఇళ్లు కేటాయించనున్నారు. హైదరాబాద్ కోర్ అర్బన్ ప్రాంతంలో అల్పాదాయ, మధ్యతరగతి వర్గాలకు మరో లక్ష ఇళ్లు నిర్మించనున్నట్లు ప్రభుత్వం ఇప్పటికే ప్రకటించింది.

మొదటి విడత గత ఏడాది ఫిబ్రవరిలో నారాయణపేట జిల్లాలో ప్రారంభమైంది. ఆ విడతలో మొత్తం 3,24,952 ఇళ్లు మంజూరయ్యాయి. వాటిలో 2,74,301 నిర్మాణాలు చేపట్టగా, సుమారు 1.1 లక్షల ఇళ్లు గృహప్రవేశాలకు సిద్ధమయ్యాయి. ఇవాళ కొఠారిలో సామూహిక గృహప్రవేశ కార్యక్రమం నిర్వహించనున్నారు.

కేంద్ర ప్రభుత్వ ప్రధానమంత్రి ఆవాస్ యోజన నిబంధనల ప్రకారం ఇళ్లకు కేంద్రం పట్టణ ప్రాంతానికి రూ.1.5 లక్షలు, గ్రామీణ ప్రాంతానికి రూ.72,000 ఇవ్వాల్సి ఉంది. కానీ కేంద్రం నుంచి నిధులు రాకపోవడంతో, చివరి విడతగా రూ.60,000 వరకు లబ్ధిదారులకు ఇంకా అందలేదు. ఈ నేపథ్యంలో, 'కేంద్రం నిధులు ఇవ్వకపోయినా, ప్రతి లబ్ధిదారుడికి రూ.5 లక్షలు ఖచ్చితంగా ఇస్తామ'ని గృహనిర్మాణ శాఖ మంత్రి పొంగులేటి శ్రీనివాస్ రెడ్డి హామీ ఇచ్చారు. పెద్ద ఎత్తున గృహ నిర్మాణ కార్యక్రమాన్ని చేపడుతున్న తెలంగాణ దేశానికే మార్గదర్శకంగా నిలుస్తుందని ఆయన వ్యాఖ్యానించారు.

ఈ కార్యక్రమం ముగిసిన తర్వాత సీఎం కాగజ్నగర్ ఎక్స్ రోడ్స్ వద్ద పలు అభివృద్ధి పనులకు ప్రారంభోత్సవాలు, శంకుస్థాపనలు చేయనున్నారు. అనంతరం బహిరంగ సభలో ప్రసంగిస్తారు. సీఎం పర్యటనకు పోలీసులు పటిష్ట భద్రతా ఏర్పాట్లు చేశారు. కొఠారి గ్రామానికి చెందిన ఉన్నమ్మ అనే లబ్ధిదారుడు 'మా కల నెరవేర్చిన సీఎంకు ధన్యవాదాలు' అని పేర్కొన్నారు.