ఢిల్లీలో కేంద్ర మంత్రులతో భేటీ: తెలంగాణ రోడ్లు, విమానాశ్రయాల ప్రాజెక్టులపై చర్చ – రేవంత్ రెడ్డి

తెలంగాణ ముఖ్యమంత్రి రేవంత్ రెడ్డి పెండింగ్‌లో ఉన్న రాష్ట్ర ప్రాజెక్టుల కోసం ఢిల్లీలో కేంద్ర మంత్రులతో వరుస భేటీలు నిర్వహించారు. రోడ్లు, ఎయిర్‌పోర్టుల అభివృద్ధిపై చర్చించారు.

కేంద్ర రోడ్డు రవాణా శాఖ మంత్రి నితిన్ గట్కరీతో సమావేశమైన సీఎం, రీజనల్ రింగ్ రోడ్డు (RRR) ప్రాజెక్టుపై చర్చించారు. ఆర్ఆర్ఆర్ ఉత్తర భాగానికి 95 శాతం భూసేకరణ పూర్తయిందని, మిగతా పనులు వెంటనే ప్రారంభించాలని కోరారు. దక్షిణ భాగం భూసేకరణకు కేంద్ర మంత్రిమండలి ఆమోదం కోసం చొరవ చూపాలని కోరగా, బందర్ పోర్ట్ కనెక్టివిటీ రోడ్డుకు అనుమతి ఇవ్వాలని విజ్ఞప్తి చేశారు.

కేంద్ర విమానయాన శాఖ మంత్రి కింజరాపు రామ్మోహన్ నాయుడును కలిసి సీఎం, వరంగల్ మామునూరు, ఆదిలాబాద్ ఎయిర్‌పోర్టుల అభివృద్ధిపై చర్చించారు. వరంగల్ ఎయిర్‌పోర్ట్ కోసం 253 ఎకరాల భూమిని రాష్ట్ర ప్రభుత్వం సేకరించి ఇవ్వడంపై కేంద్ర మంత్రి అభినందించారు. టెండర్ ప్రక్రియ 3-4 వారాల్లో పూర్తవుతుందని, జూన్ 2, 2028 నాటికి రెండు విమానాశ్రయాల నిర్మాణం పూర్తి చేస్తామని సీఎం తెలిపారు. విమానాశ్రయ టర్మినల్స్‌ను కాకతీయ రాజవంశ సంస్కృతికి ప్రతిబింబంగా నిర్మిస్తామని కేంద్ర మంత్రి పేర్కొన్నారు.

ఢిల్లీ పర్యటనలపై విపక్షాల విమర్శలకు ఈ సందర్భంగా రేవంత్ రెడ్డి స్పందించారు. రాష్ట్ర సమస్యల పరిష్కారం కోసం తాను ఎన్నిసార్లైనా ఢిల్లీకి వెళ్తానని, భూసేకరణ, నిర్మాణం వంటి స్థానిక సహకారమూ అవసరమని వివరించారు. అన్ని పార్టీల ఎంపీలతో సమావేశమై పవర్‌పాయింట్ ప్రజెంటేషన్ ఇచ్చామని, పెండింగ్ ప్రాజెక్టులను పట్టాలెక్కించేందుకు కృషి చేస్తున్నామని చెప్పారు.