కొడంగల్‌లో సీఎం రేవంత్ మూడు రోజుల పర్యటన: ₹9,100 కోట్ల పనులకు శంకుస్థాపన

తెలంగాణ ముఖ్యమంత్రి రేవంత్ రెడ్డి మూడు రోజుల పర్యటన కోసం తన సొంత నియోజకవర్గం కొడంగల్‌కు వెళ్తున్నారు. నవంబర్ 7, 8 తేదీల్లో ఆయన కొడంగల్‌లో పర్యటిస్తారు. నవంబర్ 9న హకీంపేటలో భారీ రైతు బహిరంగ సభ నిర్వహిస్తున్నారు.

పర్యటనలో భాగంగా మెగా రైతు మేళ, ఇండస్ట్రియల్ ఎక్స్‌పోను సీఎం ప్రారంభిస్తారు. దాదాపు ₹9,100 కోట్ల విలువైన అభివృద్ధి పనులకు శంకుస్థాపనలు, ప్రారంభోత్సవాలు చేస్తారు. కొడంగల్ నియోజకవర్గంలో ₹953.48 కోట్ల అంచనా వ్యయంతో 13 అభివృద్ధి పనులను ప్రారంభిస్తారు.

నవంబర్ 7న ఉదయం 11 గంటలకు హకీంపేటకు చేరుకుంటారు. 11:10కి రైతు మేళ, ఇండస్ట్రియల్ ఎక్స్‌పోను ప్రారంభించి స్టాళ్లను సందర్శిస్తారు. మధ్యాహ్నం ఆదర్శ రైతులు, వ్యవసాయ శాస్త్రవేత్తలతో ముఖాముఖి నిర్వహిస్తారు. వ్యవసాయంలో ఆధునిక పద్ధతులు, రైతుల సమస్యలపై చర్చ జరుగుతుంది. తర్వాత పారిశ్రామికవేత్తలతో సమావేశమై పెట్టుబడులు, పరిశ్రమల ఏర్పాటుపై చర్చిస్తారు. సాయంత్రం కొడంగల్‌లోని నివాసానికి చేరుకుని అక్కడే బస చేస్తారు.

నవంబర్ 8న హకీంపేటలో స్వయం సహాయక సంఘాల మహిళలతో సీఎం సమావేశమవుతారు. లగచర్ల ఇండస్ట్రియల్ కారిడార్‌లో ₹81 కోట్ల అంచనా వ్యయంతో నిర్మించనున్న ఎకో పామ్ ఆయిల్ ఫ్యాక్టరీకి శంకుస్థాపన చేస్తారు. ₹46.08 కోట్లతో పూర్తయిన 10 ప్రభుత్వ భవనాలను ప్రారంభిస్తారు. హకీంపేటలో NATCO సంస్థ CSR నిధులతో నిర్మించిన పాఠశాల, జూనియర్ కళాశాల భవనాలు, ప్రాథమిక ఆరోగ్య కేంద్రాన్ని ప్రారంభిస్తారు. బొమ్మరాస్‌పేట, కొడంగల్, దౌలతాబాద్‌లో నూతన పోలీస్ స్టేషన్, సమన్విత మండల కార్యాలయ భవనం, సైన్స్ మ్యూజియం, ప్రభుత్వ జూనియర్ కళాశాల, బాలంపేట ప్రాథమిక ఆరోగ్య కేంద్రాన్ని ప్రారంభిస్తారు.

నవంబర్ 9న హకీంపేటలో రైతు బహిరంగ సభ జరుగుతుంది. ఈ సభకు దాదాపు 50 వేల మంది రైతులు హాజరవుతారని అధికారులు ఏర్పాట్లు చేస్తున్నారు. రంగారెడ్డి, వికారాబాద్, నారాయణపేట, సంగారెడ్డి, మెదక్, మహబూబ్‌నగర్, వనపర్తి, గద్వాల, నాగర్‌కర్నూల్, మెడ్చల్, మల్కాజ్‌గిరి జిల్లాల నుంచి రైతులను తీసుకొస్తున్నారు. సాయంత్రం 4 నుంచి రాత్రి 7 గంటల వరకు సభ జరుగుతుంది. సభలో సీఎం రేవంత్ రెడ్డి రైతులను ఉద్దేశించి ప్రసంగిస్తారు.

కలెక్టర్ దీపక్ తివారీ, ఎస్పీ స్నేహ మెహ్రా రైతు మేళ ప్రాంగణం, మహిళల సమావేశ ప్రదేశం, బహిరంగ సభ వేదికను పరిశీలించారు. భద్రత కోసం 2,500 మందికి పైగా పోలీసు బలగాలను రంగంలోకి దించారు. వివిధ జిల్లాల సీనియర్ అధికారులు ఈ ఏర్పాట్లలో పాల్గొంటున్నారు. ట్రాఫిక్ ఏర్పాట్లు, VIP రూట్ క్లియరెన్స్, ప్రజా సమావేశ ఏర్పాట్లపై పోలీస్ శాఖ చర్యలు తీసుకుంటోంది.