సూడాన్‌లో RSF చుట్టుముట్టిన అల్‌ ఒబేద్; 72 గంటల్లో తుది దాడి హెచ్చరిక

సుడాన్ లోని నార్త్ కోర్దోఫాన్ రాష్ట్ర రాజధాని అల్ ఒబేద్ నగరాన్ని పారామిలిటరీ రాపిడ్ సపోర్ట్ ఫోర్సెస్ (RSF) పూర్తిగా చుట్టుముట్టింది. నగరంపై జరిగిన డ్రోన్ దాడుల్లో ఐదు పెద్ద చమురు ట్యాంక్ ఫాంలు ధ్వంసమయ్యాయి. రాబోయే 72 గంటల్లో RSF బలగాలు తుది దాడికి సిద్ధమవుతున్నట్లు రక్షణ నిపుణులు హెచ్చరించారు. సుడాన్ అధికారిక సైన్యం వైమానిక దాడులతో ఈ ముట్టడిని ఎదుర్కొంటోంది.

అల్ ఒబేద్ నగరం భౌగోళికంగా, ఆర్థికంగా సుడాన్‌కు కీలకమైనది. పశ్చిమ దార్ఫూర్ ప్రాంతాన్ని తూర్పు ప్రాంతాలతో కలిపే ప్రధాన జాతీయ రహదారి, దేశ ఆర్థిక వ్యవస్థకు ముఖ్యమైన చమురు పైప్‌లైన్లు ఈ నగరం మీదుగా వెళ్తాయి. RSF నగరాన్ని ఆక్రమించుకుంటే, రాజధాని ఖార్టూమ్ తర్వాత వారికి ఇదే అతిపెద్ద ప్రాంతీయ విజయం అవుతుంది.

గతంలో 2025 అక్టోబర్‌లో RSF ఆల్ ఫాషర్ నగరాన్ని స్వాధీనం చేసుకున్న సమయంలో స్థానిక జాగ్వా పూర్ తెగలపై సామూహిక హింస, లైంగిక దాడులు, బలవంతపు అదృశ్యాలు జరిగాయని UN నివేదికలు తెలిపాయి. అక్కడ 18 నెలల పాటు కఠిన ఆంక్షలు విధించారు. ఇదే తరహా వ్యూహం అల్ ఒబేద్‌లోనూ జరగొచ్చని ఐక్యరాజ్య సమితి భద్రతా మండలి ఆందోళన వ్యక్తం చేసింది. మానవ హక్కుల ఉల్లంఘనలను వెంటనే ఆపాలని డిమాండ్ చేసింది.

2023 ఏప్రిల్‌లో అధికారం కోసం మొదలైన ఈ అంతర్యుద్ధం సుడాన్‌ను తీవ్ర మానవీయ సంక్షోభంలోకి నెట్టింది. ఇప్పటి వరకు లక్షలాది మంది ప్రాణాలు కోల్పోగా, 1.4 కోట్ల మందికి పైగా శరణార్థులుగా మారారు. దేశంలో 3.3 కోట్ల మందికి అత్యవసర ఆహారం, మందుల సహాయం అవసరమని UN అంచనా వేస్తోంది. ఆకలి, అంటువ్యాధులు, లైంగిక హింస రోజువారీ సమస్యలుగా మారాయి. అంతర్జాతీయ మీడియాలో సుడాన్ సంక్షోభానికి 1% మాత్రమే కవరేజ్ లభిస్తోందని రక్షణ నిపుణులు ఆవేదన వ్యక్తం చేస్తున్నారు.

ప్రపంచ దేశాలు వెంటనే జోక్యం చేసుకుని శాంతి చర్చలు జరపాలని మానవ హక్కుల సంఘాలు కోరుతున్నాయి. లేకపోతే అల్ ఒబేద్ మరో స్మశానవాటికగా మారే ప్రమాదం ఉందని హెచ్చరిస్తున్నాయి.