RTC విలీనం డిమాండ్: బస్ భవన్ వద్ద ఆమరణ దీక్ష, కార్మికులను అరెస్ట్ చేసిన పోలీసులు

తెలంగాణ రాష్ట్రంలో రేవంత్ రెడ్డి నేతృత్వంలోని కాంగ్రెస్ ప్రభుత్వం RTC ని ప్రభుత్వంలో విలీనం చేయాలనే డిమాండ్ పై కార్మికులతో వివాదం తీవ్రమైంది. తెలంగాణ జాతీయ మజూరు యూనియన్ వ్యవస్థాపక అధ్యక్షుడు హనుమంతు ముదిరాజు నేతృత్వంలో పలువురు RTC కార్మికులు హైదరాబాద్ లోని బస్ భవన్ వద్ద ఆమరణ నిరాహార దీక్ష ప్రారంభించారు.

గత మూడు నెలలుగా RTC విలీనంపై రాష్ట్ర ప్రభుత్వానికి విన్నవిస్తున్నప్పటికీ, ప్రభుత్వం ఎన్నికలకే మొగ్గు చూపుతూ విలీనాన్ని పక్కన పెట్టిందని కార్మికులు ఆందోళన వ్యక్తం చేశారు. RTC JIC కూడా ఈ దీక్షకు మద్దతు తెలిపింది.

దీక్షకు అనుమతి లేదంటూ పోలీసులు బస్ భవన్ వద్ద భారీగా మోహరించారు. దాదాపు అరగంట పాటు అనుమతి ఇచ్చిన తర్వాత పోలీసులు హనుమంతు ముదిరాజుతో సహా అందరు కార్మికులను అరెస్ట్ చేసి పోలీస్ స్టేషన్ కు తరలించారు.

అపాయింటెడ్ డేట్ ఖచ్చితంగా ప్రకటించాలని, PRC తో పాటు RTC ని ప్రభుత్వంలో తక్షణం విలీనం చేయాలని కార్మికులు డిమాండ్ చేశారు. CM డౌన్ డౌన్ అంటూ నినాదాలు కూడా చేశారు. ఎన్నికల హడావిడి మొదలు కాబోతున్న తరుణంలో ఈ అరెస్టులు రేవంత్ సర్కార్ కు ఇబ్బందికరంగా మారాయని విమర్శకులు అంటున్నారు.