సదరం సర్టిఫికెట్ స్లాట్ బుకింగ్ అక్టోబర్ 31 నుంచి పునఃప్రారంభం

ఆంధ్రప్రదేశ్‌లో సదరం సర్టిఫికెట్ వైద్య పరీక్షలకు స్లాట్ బుకింగ్ ప్రక్రియ అక్టోబర్ 31 నుంచి మళ్లీ ప్రారంభం కానుంది. ఈ దఫా దాదాపు 40 వేల మందికి ఆన్‌లైన్‌లో స్లాట్ బుక్ చేసుకునే అవకాశం ఇవ్వనున్నారు. తుఫాను ప్రభావం ఉంటే తేదీ వెనక్కి జరిగే అవకాశం ఉంది.

గతంలో స్లాట్ బుక్ చేసుకున్నా వైద్య పరీక్షలకు హాజరుకాని 10 వేల మందికి అదనపు అవకాశం ఇస్తున్నారు. ఇది ఈ ఏడాదిలో రెండో దఫా. మూడో దఫా ఉండదు. తదుపరి అవకాశం వచ్చే ఏడాది మాత్రమే వస్తుంది.

కొత్త నిబంధన ప్రకారం బుక్ చేసుకున్న స్లాట్ ఆరు నెలల పాటు మాత్రమే చెల్లుబాటు అవుతుంది. ఆరు నెలల తర్వాత అది ఆటోమేటిక్‌గా ఆన్‌లైన్ నుంచి తొలగిపోతుంది. కాబట్టి ఆ గడువులోగా వైద్య పరీక్షలకు హాజరు కావాలి. 40 వేల మంది పరీక్షలు పూర్తి కావడానికి కనీసం ఆరు నెలల సమయం పడుతుంది. అందరూ ఒకేసారి రావడంతో ఆస్పత్రులపై ఒత్తిడి పడుతున్న నేపథ్యంలో ఈ కాల పరిమితి విధించినట్టు సమాచారం.

దరఖాస్తు కోసం ఇంతకుముందు సెక్రటేరియట్‌కు వెళ్లాల్సి వచ్చేది. ఇప్పుడు WhatsApp, మిత్ర app, AP Seva పోర్టల్ ద్వారా స్లాట్ బుక్ చేసుకోవచ్చు. ఫోన్ నంబర్, ఆధార్ నంబర్ నమోదు చేసి, OTP ద్వారా ఫారం నింపాలి.

సదరం సర్టిఫికెట్ అంటే ఒక వ్యక్తికి ఉన్న వికలాంగత శాతాన్ని తెలిపే అధికారిక వైద్య ధృవపత్రం. బస్సు రిజర్వేషన్, టికెట్ రాయితీ, ప్రభుత్వ పథకాలు, ఉద్యోగాలు, పెన్షన్లకు ఈ సర్టిఫికెట్ అవసరం. జిల్లాల వారీగా ఎంత కోటా ఇవ్వాలనే దానిపై కూడా ప్రభుత్వం ఆలోచిస్తున్నట్టు సమాచారం. అధికారిక నోటిఫికేషన్, ఆన్‌లైన్ దరఖాస్తు లింక్ ఇంకా విడుదల కాలేదు. అవి వచ్చాక దరఖాస్తు చేసుకోవచ్చు.