సాయికృష్ణ కేసు: కీలక నిందితుడు సీఐ నాగరాజుకు 8 రోజుల SIT కస్టడీ

విజయవాడ కృష్ణలంకకు చెందిన గాదే సాయికృష్ణ కస్టోడియల్ డెత్ కేసులో కీలక పరిణామం చోటు చేసుకుంది. ఈ కేసులో ప్రధాన నిందితుడైన సస్పెండ్ సీఐ నాగరాజుకు కోర్టు ఎనిమిది రోజుల SIT కస్టడీ మంజూరు చేసింది.

SIT ఈ కేసును ప్రత్యేకంగా దర్యాప్తు చేస్తోంది. నాగరాజు విచారణకు సహకరించడం లేదని, 12 రోజుల కస్టడీ ఇవ్వాలని SIT పిటిషన్ వేసింది. అయితే న్యాయస్థానం ఎనిమిది రోజులే అనుమతించింది. ప్రస్తుతం రాజమహేంద్రవరం సెంట్రల్ జైల్లో రిమాండ్‌లో ఉన్న నాగరాజును అక్కడే విచారించనున్నారు.

కోర్టు ఆదేశాల మేరకు ఈ నెల 10వ తేదీ వరకు ప్రతిరోజూ ఉదయం 10 నుంచి సాయంత్రం 5 గంటల వరకు విచారణ కొనసాగుతుంది. న్యాయవాది సమక్షంలో ఆడియో, వీడియో రికార్డింగ్‌తో విచారణ జరపాలని, తదుపరి రికార్డులను కోర్టుకు సమర్పించాలని న్యాయస్థానం ఆదేశించింది.

సాయికృష్ణ మరణానికి దారితీసిన వాస్తవ పరిస్థితులు, ఆధారాలు తారుమారు చేసే ప్రయత్నాలు జరిగాయా అనే అంశాలపై SIT ప్రశ్నించనుంది. మే మొదటి వారంలో మార్కాపురం నుంచి కృష్ణలంక పోలీస్‌స్టేషన్‌కు తీసుకొచ్చిన సాయికృష్ణ ఆ తర్వాత ఏమయ్యాడనేది మిస్టరీగా మారింది. నాగరాజు రిమాండ్ రిపోర్టులో SIT, ఇది కస్టోడియల్ డెత్ అని, మృతదేహాన్ని మాయం చేసినట్లు తెలిపింది.

కోర్టు నిబంధనల ప్రకారం ఈ ఎనిమిది రోజుల విచారణ పూర్తయ్యాక రికార్డులు సమర్పించాల్సి ఉంటుంది. SIT ఈ కేసులో నిగ్గు తేల్చగలదా అన్నది ఇప్పుడు కీలకంగా మారింది.