సాయి కృష్ణ కేసు: సీఐ నాగరాజును మేజిస్ట్రేట్ ముందు హాజరుపరిచిన SIT

విజయవాడలో సాయి కృష్ణ అదృశ్యం కేసుకు సంబంధించి మాజీ సీఐ నాగరాజును SIT అధికారులు రెండవ అడిషనల్ జ్యుడీషియల్ మేజిస్ట్రేట్ కోర్టులో హాజరుపరిచారు. న్యాయమూర్తి తన చాంబర్లో నాగరాజుతో ఒత్తిడేమీ లేకుండా మాట్లాడారు. కోర్టులో ఎక్కువ మంది ఉండటంతో విచారణను ప్రత్యేకంగా చాంబర్లోనే నిర్వహించారు.

SIT బృందం కోర్టుకు సమగ్ర నివేదిక సమర్పించింది. ఈ నివేదికలో సాక్ష్యాలు, వాంగ్మూలాలు, టెక్నికల్ ఎవిడెన్స్ వివరాలు ఉన్నాయి. గత మూడు రోజులుగా సేకరించిన ఆధారాల ఆధారంగా SIT ఈ రిపోర్టును తయారు చేసింది.

సాయి కృష్ణపై నాన్ బెయిలబుల్ వారెంట్ అమలులో ఉండగా, టాస్క్ ఫోర్స్ సిబ్బంది అతన్ని తీసుకొచ్చి కృష్ణలంక పోలీసులకు అప్పగించారు. అప్పగింత తీసుకున్న CI నాగరాజు ఆధ్వర్యంలో సాయి కృష్ణ పోలీస్ కస్టడీలో ఉండగా చనిపోయినట్లు SIT నిర్ధారించింది. సాయి కృష్ణ తల్లి విజయలక్ష్మి ఇచ్చిన ఫిర్యాదులో తన కొడుకు పోలీస్ స్టేషన్లో హింసకు గురై మరణించాడని, మృతదేహాన్ని కృష్ణలంక స్మశానంలో అనాథశవాలతో పాటు దహనం చేశారని ఆరోపించారు.

SIT రిమాండ్ రిపోర్టులో సాయి కృష్ణ పోలీస్ కస్టడీలో మరణించడం, స్టేషన్ లోనే ఎస్సై మృతదేహం చూడటం, సీసీటీవీ ఫుటేజ్ 28 రోజులకు బదులు రెండు రోజులే లభ్యం కావడం వంటి విషయాలు పొందుపరిచారు. మిస్సింగ్ ఫుటేజ్పై నాగరాజు సమాధానం ఇవ్వలేదని పోలీసులు తెలిపారు. కేసుకు సంబంధించి 22 మంది నుంచి స్టేట్మెంట్లు నమోదు చేసి, ఫారెన్సిక్, ఐటీ బృందాలు సాక్ష్య సేకరణ కొనసాగిస్తున్నాయి.

SIT అధికారులు మరింత దర్యాప్తు కోసం నాగరాజును కస్టడీకి కోరనున్నట్లు తెలిపారు. న్యాయమూర్తి ఈ పిటిషన్‌పై త్వరలో నిర్ణయం తీసుకోనున్నారు. సాయి కృష్ణ తల్లి ఫిర్యాదు, టాస్క్ ఫోర్స్, స్టేషన్ సిబ్బంది వాంగ్మూలాల ఆధారంగా నాగరాజుదే కీలక పాత్రని SIT భావిస్తోంది.