సాయి కృష్ణ కస్టడీ మృతి కేసులో సీఐ నాగరాజుకు 8 రోజుల పోలీస్ కస్టడీ

విజయవాడలో సంచలనం సృష్టించిన సాయి కృష్ణ కస్టడీ మృతి కేసులో కోర్టు కీలక ఉత్తర్వులు జారీ చేసింది. సస్పెండ్ చేయబడిన సీఐ నాగరాజును ఎనిమిది రోజుల పాటు పోలీస్ కస్టడీకి అప్పగించాలని ఆదేశించింది. ఈ నెల 10వ తేదీ వరకు నాగరాజును విచారించాలని, ఆ వివరాలను కోర్టుకు సమర్పించాలని సూచించింది.

తాజా ఉత్తర్వుల ప్రకారం రాజమహేంద్రవరం సెంట్రల్ జైల్లో ఉన్న నాగరాజును ప్రతిరోజు ఉదయం 10 నుంచి సాయంత్రం 5 గంటల వరకు విచారించనున్నారు. అతని న్యాయవాది సమక్షంలో ఆడియో, వీడియో రికార్డింగులతో విచారణ జరుగుతుంది. విచారణ ముగిసిన తర్వాత రికార్డింగులను కోర్టు ముందు సమర్పించాలని కోర్టు స్పష్టం చేసింది.

ఈ కేసులో సాయి కృష్ణ మృతదేహం ఇప్పటికీ లభ్యం కావడం లేదు. ఇప్పటికే ఐదుగురు కానిస్టేబుళ్లను అరెస్టు చేయగా, నాగరాజు జుడిషియల్ రిమాండ్ లో ఉన్నారు. సిట్ అధికారులు కేసును వివిధ కోణాల్లో దర్యాప్తు చేస్తున్నారు. ఇంతకు ముందు నాగరాజు ప్రశ్నించినప్పుడు వివరాలు ఇవ్వనందువల్లే కస్టడీకి ఇవ్వాలని పోలీసులు కోర్టును కోరినట్లు తెలుస్తోంది. కస్టడీ సమయంలో మృతదేహం విషయంపై ప్రశ్నించే అవకాశం ఉందని భావిస్తున్నారు.