సాయి కృష్ణ మిస్సింగ్ కేసులో సీఐ నాగరాజును SIT అదుపులోకి తీసుకుంది

విజయవాడ సాయి కృష్ణ మిస్సింగ్ కేసులో కీలక పరిణామం చోటు చేసుకుంది. ఆరోపణలు ఎదుర్కొంటున్న కృష్ణలంక పోలీస్ స్టేషన్ సీఐ నాగరాజును SIT బృందం అదుపులోకి తీసుకుంది.

సింగనగర్‌లోని ఆయన నివాసానికి వెళ్లిన SIT అధికారులు నాగరాజును అదుపులోకి తీసుకున్నారు. ఈ సందర్భంగా ఆయన మద్దతుదారులు ఇంటి వద్ద ఆందోళనకు దిగారు. దీంతో పోలీసులు ముందుగా పోలీస్ గెస్ట్‌హౌస్‌లో విచారించాలనుకున్నారు, కానీ ఆందోళన నేపథ్యంలో నాగరాజును విజయవాడ కమాండ్ కంట్రోల్ రూమ్‌కు తీసుకువెళ్లారు.

SIT బృందం నాగరాజును విచారించనుంది. విచారణ తర్వాత ఆయనకు వైద్య పరీక్షలు నిర్వహించి కోర్టులో హాజరుపరచనున్నారు. ఈ కేసులో సాయి కృష్ణ తల్లి, కుటుంబ సభ్యుల స్టేట్‌మెంట్లతో పాటు కృష్ణలంక పోలీస్ స్టేషన్ సిబ్బందిని కూడా SIT ఇప్పటికే విచారించింది. స్టేషన్‌లోని సీసీ కెమెరా ఫుటేజ్ మాయమైన విషయాన్ని కూడా దర్యాప్తు చేస్తోంది. నాగరాజు విచారణ తర్వాత కేసుకు సంబంధించిన కీలక విషయాలు వెలుగులోకి వస్తాయని భావిస్తున్నారు.