సీపీ సజ్జనార్ రహస్య తనిఖీ: 12 పోలీస్ స్టేషన్లలో సిబ్బంది అమర్యాద బయటపడింది

నగర పోలీస్ కమిషనర్ సజ్జనార్ వారం రోజుల పాటు రహస్య ఆపరేషన్ నిర్వహించారు. నగరంలోని 12 పోలీస్ స్టేషన్లలో సిబ్బంది ప్రవర్తనను అండర్ కవర్‌గా పరిశీలించారు.

ఈ ఆపరేషన్‌లో రిసెప్షనిస్టులు, అడ్మిన్ ఎస్ఐలు, ఏఎస్ఐలు, కానిస్టేబుల్స్ ఫిర్యాదు చేసేందుకు వచ్చే వారితో అమర్యాదగా వ్యవహరిస్తున్నట్లు తేలింది. తమ పరిధి కాదని చెప్పి తప్పించుకోవడం, ఏదైనా అడిగితే సూటిపోటి మాట్లాడడం వంటివి వెలుగులోకి వచ్చాయి.

వారం రోజుల ఆపరేషన్ తర్వాత సజ్జనార్ సేకరించిన ఆధారాలను సదరు సిబ్బందికి చూపించారు. మీ కుటుంబ సభ్యులు ఫిర్యాదు కోసం వచ్చినా ఇలాంటి ఇబ్బందులు ఎదురైతే ఎలా ఉంటుందో ఆలోచించండని హితవు పలికారు. ఇకపై ఇలాంటివి పునరావృతమైతే కఠిన చర్యలు తీసుకుంటామని హెచ్చరించారు.

నగరంలోని పలు పోలీస్ స్టేషన్లలో సిబ్బంది ప్రవర్తనపై ఇప్పటికే కొన్ని ఫిర్యాదులు, అవినీతి ఆరోపణలు ఉన్నాయి. సజ్జనార్ ఈ రహస్య ఆపరేషన్ ద్వారా నేరుగా సమస్యను గుర్తించి దిద్దుబాటు చర్యలు తీసుకున్నట్లు పోలీస్ వర్గాలు తెలిపాయి.