అత్యవసర పరిస్థితి చట్టబద్ధమే, బీజేపీ పూర్తి నేపథ్యం చెప్పాలి : సల్మాన్ ఖుర్షీద్

సీనియర్ కాంగ్రెస్ నేత సల్మాన్ ఖుర్షీద్ 1975 నాటి అత్యవసర పరిస్థితిని సమర్థిస్తూ బీజేపీ విమర్శలకు సమాధానమిచ్చారు. ఆ రోజుల్లో తీసుకున్న నిర్ణయం రాజ్యాంగంలోని నిబంధనల ప్రకారమే జరిగిందని, దానిని అప్పటి సుప్రీంకోర్టు కూడా సమర్ధించిందని ఆయన గుర్తుచేశారు. ఈ విషయాన్ని ప్రస్తావించే వారు పూర్తి సందర్భం, వాస్తవాలు, సుప్రీంకోర్టు ఆమోదం అన్నీ కలిపి చెప్పాలని ఆయన డిమాండ్ చేశారు. ఖుర్షీద్ మాట్లాడుతూ, “అత్యవసర పరిస్థితి విధించడం సరైనదా కాదా అన్న విషయంలో దేశం 50 సార్లు తన తీర్పు చెప్పింది. అప్పట్లో సుప్రీంకోర్టు రాజ్యాంగ ధర్మాసనం దాన్ని ఆమోదించింది. ఎ.డి.ఎం. జబల్పూర్ కేసు మనకు తెలిసిందే. ఆ చట్టం 25 ఏళ్ల పాటు కొనసాగింది. ఆ తర్వాత సుప్రీంకోర్టే దాన్ని తిప్పికొట్టింది” అని వివరించారు. కాంగ్రెస్ ప్రభుత్వం చేసిన చర్యలన్నీ రాజ్యాంగ పరిధిలోనే జరిగాయని, రాజకీయంగా దాన్ని తప్పు పట్టినా ప్రజలు 18 నెలల తర్వాత ఇందిరాగాంధీని మళ్లీ భుజాలపై ఎత్తుకుని ప్రధాని చేశారని ఆయన అన్నారు. “ఆ నిర్ణయాలకు ఉన్న నేపథ్యం, తదనంతర పరిణామాలు అన్నీ వివరించాలి. యువతకు, ప్రజలకు పూర్తి వాస్తవాన్ని వివరించాలని బీజేపీ కోరుతున్నాం” అని ఖుర్షీద్ పేర్కొన్నారు. కాంగ్రెస్ ఎప్పుడూ ఈ అధ్యాయాన్ని అంగీకరించిందని, కానీ ఇప్పుడు బీజేపీ పాత ఇష్యూని ప్రస్తావించడంలో ఉద్దేశం స్పష్టం చేయాలని ఆయన అన్నారు.