సీజనల్ వ్యాధులు పెరుగుతున్నాయి: జాగ్రత్తలు తీసుకోవాలని డాక్టర్ ముసా ఖాన్

హైదరాబాద్‌లో సీజన్ మార్పుతో వైరల్ జ్వరాలు, డెంగ్యూ, మలేరియా వంటి వ్యాధులు పెరుగుతున్నాయి. గాంధీ, ఉస్మానియా, నీలోఫర్ ఆసుపత్రులతో పాటు ఫీవర్ హాస్పిటల్‌కు వస్తున్న రోగుల సంఖ్య క్రమంగా పెరుగుతోందని ఫీవర్ హాస్పిటల్ ఇన్‌చార్జి సూపరింటెండెంట్ డా. ముసా ఖాన్ తెలిపారు. ప్రస్తుతం పెద్దగా స్పైక్ లేదని, రాబోయే రోజుల్లో మరింత పెరిగే అవకాశం ఉందని ఆయన పేర్కొన్నారు.

డెంగ్యూ, మలేరియా, టైఫాయిడ్, చికెన్‌గున్యా లక్షణాల గురించి వివరిస్తూ, జ్వరం, చలి, కీళ్ల నొప్పులు, తలనొప్పి, వాంతులు వంటివి కనిపిస్తాయన్నారు. డెంగ్యూ సందర్భంలో చిగుళ్ల నుంచి రక్తం రావడం, చర్మంపై ఎర్రటి మచ్చలు, మలం నల్లగా లేదా ఎర్రగా రావడం జరిగితే వెంటనే ఆసుపత్రికి రావాలని సూచించారు.

ప్రజలు శుభ్రత పాటించాలని, సబ్బుతో చేతులు కడుక్కోవడం, మరుగునీరు తాగడం, దోమల నుంచి రక్షణ కోసం మస్కిటో నెట్స్, కాయిల్స్, రిపెల్లెంట్స్ వాడాలని డా. ముసా ఖాన్ సూచించారు. ఇంటి పరిసరాలు శుభ్రంగా ఉంచుకోవాలని, నీరు నిల్వ ఉండకుండా చూసుకోవాలన్నారు.

పిల్లల విషయంలో స్కూళ్లలో దోమల నివారణ చర్యలు తీసుకోవాలని, పిల్లలు ఫుల్ స్లీవ్ దుస్తులు ధరించాలని తల్లిదండ్రులకు సూచించారు. వృద్ధులు చిన్న జ్వరం వచ్చినా నిర్లక్ష్యం చేయకుండా వైద్యులను సంప్రదించాలన్నారు.

ఫీవర్ హాస్పిటల్‌లో డాక్టర్లు, సిబ్బంది సిద్ధంగా ఉన్నారని, బెడ్లు, మందులు, టెస్ట్ కిట్లు తగినంతగా ఉన్నాయని డా. ముసా ఖాన్ వివరించారు. డెంగ్యూ, మలేరియా, డిఫ్తీరియా పరీక్షలు ఆసుపత్రిలోనే అందుబాటులో ఉన్నాయన్నారు. ప్లేట్లెట్స్ పడిపోతే భయపడాల్సిన అవసరం లేదని, చికిత్సతో కోలుకుంటారని చెప్పారు. వ్యాధులు పెరిగినా ఎలాంటి ఇబ్బంది లేకుండా చికిత్స అందించేందుకు సిద్ధంగా ఉన్నామని ఆయన హామీ ఇచ్చారు.