షేక్ హసీనా ఈ ఏడాదే బంగ్లాదేశ్ కు తిరిగి వెళ్తానని ప్రకటన

బంగ్లాదేశ్ మాజీ ప్రధాని, అవామీ లీగ్ నేత షేక్ హసీనా ఈ ఏడాది స్వదేశానికి తిరిగి వెళ్తానని ప్రకటించారు. ఒక ఇంటర్వ్యూలో ఆమె ఈ విషయాన్ని వెల్లడించారు.

దాదాపు రెండేళ్ల క్రితం ప్రజా తిరుగుబాటు నేపథ్యంలో హసీనా బంగ్లాదేశ్ నుండి భారత్కు వచ్చారు. ప్రస్తుతం భారత్లో ప్రవాసంలో ఉన్నారు. బంగ్లాదేశ్ కోర్టు ఆమెకు ఉరిశిక్ష విధించింది. ఈ శిక్ష రాజకీయ ప్రతీకారమేనని ఆమె ఆరోపించారు. చావుకు తాను భయపడబోనని స్పష్టం చేశారు.

అన్ని అడ్డంకులను, కుట్రలను అధిగమించి తాను తిరిగి వెళ్తానని హసీనా అన్నారు. మహమ్మద్ యూనస్ నేతృత్వంలోని తాత్కాలిక ప్రభుత్వాన్ని, ఆ తర్వాత అధికారంలోకి వచ్చిన బీఎన్పీ ప్రభుత్వాన్ని ఆమె తీవ్రంగా విమర్శించారు. దేశంలో నిషేధాలు ఉన్నప్పటికీ ఇటీవల అవామీ లీగ్ తన 77వ వ్యవస్థాపక దినోత్సవాన్ని జరుపుకుంది. ఈ పార్టీ కేవలం కాగితాలపై కాకుండా ప్రజల గుండెల్లో పాతుకుపోయిందని హసీనా వ్యాఖ్యానించారు.

దాదాపు రెండేళ్ల తర్వాత ఈ ఇంటర్వ్యూలో హసీనా తిరిగి రావడంపై స్పష్టత ఇచ్చారు. బంగ్లాదేశ్ లో రాజకీయ పరిస్థితులు సంక్లిష్టంగా ఉన్నాయి. హసీనా తిరిగి వెళ్లే ప్రయత్నంలో ఎలాంటి చట్టపరమైన, రాజకీయ ఇబ్బందులు ఎదుర్కోవాల్సి ఉంటుందో చూడాలి.