సిద్దిపేట జిల్లాలో మేకల మందపై కుక్కల దాడి: రూ.10 లక్షల నష్టం

సిద్దిపేట జిల్లా దుబ్బాక మండలం ధర్మాజీపేట వార్డులో రైతుల మేకల మందపై కుక్కలు దాడి చేశాయి. ఈ దాడుల్లో దాదాపు 60 మేకలు మృతి చెందగా, రూ.10 లక్షల వరకు ఆస్తి నష్టం జరిగినట్టు రైతులు చెబుతున్నారు.

అదే గ్రామానికి చెందిన మరో రైతుకు చెందిన 20 మేకలపైనా కుక్కలు దాడి చేశాయి. ఇద్దరు రైతుల మందలపై జరిగిన దాడులతో కలిపి సుమారు 60 మేకలు గాయపడ్డాయి లేదా మృతి చెందాయి. ఈ నష్టంపై రైతులు అధికారులకు ఫిర్యాదు అందజేసినట్టు తెలిపారు.

మేకల కాపర్లు ఉదయాన్నే మేకలను అడవికి తీసుకెళ్తారు. మేపిన తర్వాత సాయంత్రం ఇంటికి తీసుకొచ్చి పాకలో వదిలేస్తారు. రాత్రి 10-11 గంటల సమయంలో కుక్కలు గుంపుగా వచ్చి మేకలపై దాడి చేస్తున్నాయని రైతులు చెబుతున్నారు. తెల్లారి చూసేసరికి మేకలు రక్తపు మడుగులో పడి మృతి చెంది ఉంటాయని వారు తెలిపారు.

ఇంతకుముందు దుబ్బాక పరిసరాల్లో చాలా చోట్ల కుక్కలు మనుషులపైనా దాడి చేశాయని రైతులు గుర్తు చేస్తున్నారు. ఇప్పుడు ఆ దాడులు మేకలు, గొర్రెలపైకి మళ్లాయని, దీంతో లక్షల రూపాయల్లో ఆస్తి నష్టం జరుగుతోందని వారు ఆవేదన వ్యక్తం చేస్తున్నారు. ఉమ్మడి మెదక్ జిల్లా వ్యాప్తంగా ఇదే పరిస్థితి కనిపిస్తోందని వారు అంటున్నారు.

ఇప్పటికే పలుమార్లు అధికారులకు ఫిర్యాదు చేసినా ఎవరూ స్పందించలేదని రైతులు ఆరోపిస్తున్నారు. ఆ కుక్కలను వెంటనే బంధించాలని వారు డిమాండ్ చేస్తున్నారు.