కరీంనగర్‌లో పక్షవాతంతో మంచం పట్టిన తల్లిని బావిలో పడేసిన కుమారులు అరెస్ట్

కరీంనగర్ జిల్లా ఎలబోతారం గ్రామంలో పక్షవాతంతో మంచం పట్టిన వృద్ధురాలు నూనె వెంకటమ్మ హత్య కేసులో పోలీసులు ఇద్దరు కుమారులను అరెస్టు చేశారు. పెద్ద కుమారుడు సమ్మయ్య, చిన్న కుమారుడు శ్రీనివాస్‌ను అరెస్టు చేసినట్లు పోలీసులు తెలిపారు.

ఈ ఏడాది ఏప్రిల్ 6న వెంకటమ్మ కనిపించకుండా పోయారు. కుటుంబ సభ్యులు గ్రామంలో వెతికారు. మరుసటి రోజు ఇంటికి 300 మీటర్ల దూరంలోని వ్యవసాయ బావిలో ఆమె మృతదేహం లభించింది. మొదట ఆమె ఆత్మహత్య చేసుకున్నట్లు భావించారు.

అయితే రెండో కుమారుడు అనుమానం వ్యక్తం చేస్తూ పోలీసులకు ఫిర్యాదు చేశారు. మంచం నుంచి లేవలేని వృద్ధురాలు 300 మీటర్ల దూరంలోని బావి వద్దకు ఎలా వెళ్లిందని పోలీసులు దర్యాప్తు ప్రారంభించారు. దర్యాప్తులో తల్లిని కుమారులే బావిలో పడేసినట్లు తేలిందని పోలీసులు వెల్లడించారు.

తల్లి ఇంట్లో చనిపోతే ఇల్లు వదిలేయాల్సి వస్తుందనే మూఢ నమ్మకంతో ఈ హత్య జరిగినట్లు పోలీసులు గుర్తించారు. ఎవరి వంతులో తల్లి చనిపోతే వారు ఇల్లు వదిలి వెళ్లాలనే ఆచారం ఉన్నట్లు విచారణలో తేలింది. ఈ నమ్మకంతో పెద్ద కుమారుడు, చిన్న కుమారుడు కలిసి పథకం వేసినట్లు పోలీసులు తెలిపారు.

ఐదు నెలల దర్యాప్తు తర్వాత పోలీసులు కేసు ఛేదించారు. సమ్మయ్య, శ్రీనివాస్‌ను అరెస్టు చేసి జైలుకు తరలించారు.