దక్షిణాఫ్రికాలో వలస వ్యతిరేక నిరసనల ముందు వేలాది మంది ప్రవాసులు స్వదేశాలకు తరలింపు

దక్షిణాఫ్రికాలో జూన్ 30 నాటి వలస వ్యతిరేక నిరసనల ముప్పు కారణంగా గత రెండు వారాల్లో కనీసం 13 వేల మంది ప్రవాసులు దేశం విడిచి వెళ్లిపోయారు. మలావి, మొజాంబిక్, జింబాబ్వే, ఘనా, నైజీరియా తదితర ఆఫ్రికా దేశాల నుంచి వలస వచ్చిన వీరు హింసాత్మక దాడులు, హత్య బెదిరింపులతో భయాందోళనకు గురై తిరిగి స్వదేశాలకు వెళ్తున్నారు. 'మార్చ్ అండ్ మార్చ్ మూవ్‌మెంట్', 'ఆపరేషన్ డుడూలా' వంటి సంస్థలు చట్టవిరుద్ధ వలసలు, ఉద్యోగాలు దోచుకోవడంపై నిరసనలు ప్రకటించాయి. అయితే చట్టబద్ధంగా వచ్చిన వారు సైతం భయభ్రాంతులయ్యారు. నిరసనకారులు తమను చంపుతామని బెదిరించారని, పోలీసులు కూడా రక్షించకపోగా అరెస్టులు చేస్తున్నారని పలువురు వలసదారులు ఆవేదన వ్యక్తం చేశారు. దక్షిణాఫ్రికాలో 30 లక్షలకు పైగా ప్రవాసులు నివసిస్తున్నారు. దేశంలో నిరుద్యోగం 32 శాతం దాటగా, 15–24 ఏళ్ల యువతలో అది 60 శాతానికి పైగా ఉంది. చాలా మంది స్థానికులు చట్టవిరుద్ధ వలసదారులు తక్కువ వేతనాలకు పనిచేస్తూ ఉద్యోగాలు కొల్లగొడుతున్నారని ఆరోపిస్తున్నారు. అధ్యక్షుడు సిరిల్ రామాఫోసా మాట్లాడుతూ, వలసలపై ఆగ్రహాన్ని అర్థం చేసుకోగలమని, నిరసన చేసే హక్కు ఉందని కానీ హింస, జాతివివక్ష ఏ మాత్రం సహించబోమని హెచ్చరించారు. 'మా దేశంలో జాత్యహంకారానికి, విదేశీ వ్యతిరేకతకు తావు లేదు' అని ఆయన స్పష్టం చేశారు. నిరసనల రోజున పరిస్థితి విషమించకుండా ఉండేందుకు ప్రభుత్వం కఠిన చర్యలు తీసుకుంటుందని, ఇప్పటికే పెద్ద సంఖ్యలో ప్రవాసులు తమ దేశాలకు వెళ్లిపోవడం ఆందోళన కలిగిస్తోంది.