శ్రీశైలం సిబ్బంది క్వార్టర్లు రూ.60 కోట్లతో సిద్ధం, రోడ్ల విస్తరణకు రూ.10 కోట్లు

శ్రీశైలం దేవస్థానం ఉద్యోగుల కోసం సున్నిపెంటలో రూ.60 కోట్లతో నూతన స్టాఫ్ క్వార్టర్లు నిర్మించినట్లు దేవాదాయ శాఖ మంత్రి ఆనం రామనారాయణ రెడ్డి తెలిపారు. ఆయన అధికారులతో కలిసి భవనాలను పరిశీలించారు. ఎ, బి, సి బ్లాకుల్లో మొత్తం 297 క్వార్టర్లు సిద్ధమయ్యాయి.

ప్రముఖ జ్యోతిర్లింగ క్షేత్రమైన శ్రీశైలానికి భక్తుల రద్దీ ఏటా పెరుగుతోంది. ఈ నేపథ్యంలో దేవస్థానం అభివృద్ధికి మాస్టర్ ప్లాన్ అమలు చేస్తున్నట్లు మంత్రి వివరించారు. గతంలో ముఖ్యమంత్రి చంద్రబాబు నాయుడు ఆదేశాలతో ఈ క్వార్టర్ల నిర్మాణం చేపట్టామని గుర్తు చేశారు. కొత్త క్వార్టర్లకు ఉద్యోగులు త్వరలో తమ కుటుంబాలతో మారనున్నారు. వారి అనుమానాలు నివృత్తి చేస్తామని మంత్రి హామీ ఇచ్చారు.

రోడ్లను వెడల్పు చేసేందుకు టెండర్లు త్వరలో పిలుస్తామని, ఈ పనులకు రూ.10 కోట్లు ఖర్చు అవుతుందని మంత్రి తెలిపారు. శ్రీశైలం టౌన్‌షిప్ అభివృద్ధికి 4000 హెక్టార్ల భూమి అవసరమని ప్రధాన మంత్రికి విజ్ఞప్తి చేసినట్లు మంత్రి పేర్కొన్నారు. ఎలివేటెడ్ కారిడార్ ఏర్పాటుపై కేంద్రం జాతీయ రహదారుల సంస్థ ద్వారా ప్రణాళిక సిద్ధం చేస్తోందని సమాచారం.