ఆగస్టు 15 నుంచి ప్రొద్దుటూరులో ప్లాస్టిక్ నిషేధం: కమిషనర్ అవగాహన

కడప జిల్లా ప్రొద్దుటూరు పురపాలక కమిషనర్ శ్రీనివాస విశ్వనాథ్ ఆగస్టు 15 నుంచి పట్టణంలో ప్లాస్టిక్ వాడకాన్ని నిషేధించనున్నట్లు ప్రకటించారు. స్వచ్ఛ సంకల్ప దీక్ష కార్యక్రమంలో భాగంగా ఆయన పలు ప్రాంతాల్లో స్థానికులతో మాట్లాడి అవగాహన కల్పించారు.

ప్లాస్టిక్ వల్ల ఆరోగ్యానికి, పర్యావరణానికి కలిగే హానిని వివరించారు. ప్లాస్టిక్ కవర్లు, బాటిళ్లు వాడటం వల్ల డ్రైనేజీ వ్యవస్థ మూసుకుపోయి వర్షాకాలంలో నీరు నిలిచే ప్రమాదముందని హెచ్చరించారు. ప్లాస్టిక్ వాడకంపై కఠిన చర్యలు తీసుకుంటామని స్పష్టం చేశారు.

ఈ నిషేధాన్ని విజయవంతం చేయడానికి ప్రతి ఒక్కరూ సహకరించాలని కమిషనర్ కోరారు. పరిసరాల పరిశుభ్రత ప్రజలందరి బాధ్యత అని ఆయన అన్నారు. ప్రొద్దుటూరులో ఆగస్టు 15 నుంచి ప్లాస్టిక్ వాడకాన్ని పూర్తిగా నిలిపివేయాలని ప్రజలు ప్రతిజ్ఞ చేశారు.