శ్రీశైలం ఆలయ అభివృద్ధి పనుల్లో భారీ అవకతవకలు: విజిలెన్స్ విచారణలో తేలింది

శ్రీశైలం భ్రమరాంబ మల్లికార్జున స్వామి ఆలయంలో చేపట్టిన అభివృద్ధి పనుల్లో భారీ అవకతవకలు జరిగినట్లు విజిలెన్స్ విచారణలో తేలింది. కాంట్రాక్టర్లు నిర్మాణ కొలతలను పెంచి చూపించి ఆలయ నిధులకు నష్టం కలిగించారని ఫిర్యాదులు వచ్చాయి.

గణేష్ సదన్ సీసీ రోడ్ల నిర్మాణానికి రూ.50 కోట్లకు పైగా ఖర్చు చేశారు. కానీ ఎం బుక్ లో అసలు చేసిన దానికంటే ఎక్కువగా నమోదు చేసినట్లు ఆరోపణలు ఉన్నాయి. రిటైనింగ్ వాల్ నిర్మాణంలోనూ కొలతలు పెంచి నిధుల దుర్వినియోగం జరిగిందని తేలింది.

ఈ వ్యవహారంపై పలు ఫిర్యాదులు రావడంతో విజిలెన్స్ అధికారులు దర్యాప్తు చేపట్టారు. పలు దఫాలుగా తనిఖీలు నిర్వహించి, అవకతవకలకు సంబంధించిన ఆధారాలు సేకరించారు. నష్టపోయిన సొమ్మును కాంట్రాక్టర్ల నుంచి వసూలు చేయాలని విజిలెన్స్ ఆదేశించింది.

ఈ అవకతవకలకు అప్పటి కార్యనిర్వహణాధికారులు (ఈవోలు) లవన్న, పెద్దిరాజులు బాధ్యులుగా గుర్తించారు. వీరితో పాటు ఇంజనీరింగ్ అధికారులపైనా చర్యలు తీసుకోవాలని దేవాదాయ శాఖ ఉత్తర్వులు జారీ చేసింది. ప్రస్తుతం ఆలయంలో అదనపు నిధుల రికవరీ ప్రక్రియ కొనసాగుతోంది.