మేడ్చల్‌లో విద్యార్థిపై తోటి విద్యార్థుల దాడి; భోజనం, పడక వివాదమే కారణం

మేడ్చల్ జిల్లా దమ్మాయిగూడాలో ఓ ప్రైవేట్ స్కూల్లో శుక్రవారం సాయంత్రం 10వ తరగతి విద్యార్థిపై కొంతమంది సహచరులు దాడి చేశారు. ఈ ఘటన కొద్ది రోజుల తర్వాత వెలుగులోకి వచ్చింది.

బాలుడి తల్లిదండ్రులు పోలీసులకు ఇచ్చిన ఫిర్యాదు ప్రకారం, తొమ్మిదవ తరగతి చదువుతున్నప్పుడు భోజనం, పడక విషయంలో తరచూ గొడవలు జరిగాయి. ఆ గొడవల నేపథ్యంలో పగ పెంచుకున్న సహచర విద్యార్థులు శుక్రవారం సాయంత్రం అతన్ని వేరే గదిలోకి తీసుకెళ్లి కర్రలు, చేతులతో కొట్టారు. కాలి బూట్లతో కూడా దాడి చేశారు. ఈ దాడిలో బాలుడి ముఖం, చాతి, వీపు, చేతులు, కాళ్లపై గాయాలయ్యాయి.

దాడి తర్వాత స్కూల్ యాజమాన్యం బాలుడి తండ్రికి ఫోన్ చేసి ‘మీ పిల్లోడు మెట్ల మీద నుంచి కింద పడిపోయాడు, రండి’ అని చెప్పింది. స్థానిక ఆస్పత్రిలో చికిత్స చేయించారు. తర్వాత కామారెడ్డి వెళ్లాక తల్లిదండ్రులు బాలుడిని ఒత్తిడి చేసి అడగగా, ఎనిమిది మంది క్లాస్ మేట్స్ తనను కొట్టిన విషయం బయటపడింది.

తల్లిదండ్రులు స్కూల్ నిర్లక్ష్యమే ఘటనకు కారణమని ఆరోపిస్తూ పోలీసులకు ఫిర్యాదు చేశారు. పోలీసులు కేసు నమోదు చేసి దర్యాప్తు చేస్తున్నారు. ఈ దాడిలో పాల్గొన్న విద్యార్థులపై, స్కూల్ మేనేజ్మెంట్పై కూడా సంబంధిత సెక్షన్ల కింద చర్యలు తీసుకుంటామని పోలీసులు తెలిపారు.