తాత ఆస్తిపై మనవడికి స్వతంత్ర హక్కు లేదు: సుప్రీంకోర్టు కీలక తీర్పు

తాత నుంచి తండ్రికి వచ్చిన ఆస్తిపై మనవడికి స్వతంత్ర హక్కు ఉండదని సుప్రీంకోర్టు తీర్పు చెప్పింది. తండ్రి జీవించి ఉన్నంత కాలం ఆ ఆస్తిపై మనవడు ఎలాంటి క్లెయిమ్ చేయలేరని కోర్టు స్పష్టం చేసింది.

జస్టిస్ ఆగస్టిన్ జార్జ్ మసీహ్, జస్టిస్ సునీత అగర్వాల్‌లతో కూడిన ద్విసభ్య ధర్మాసనం ఈ తీర్పు ఇచ్చింది. హిందూ వారసత్వ చట్టం, 1956 నిబంధనలను ధర్మాసనం ప్రధానంగా ప్రస్తావించింది. తాత మరణించిన తర్వాత ఆయన ఆస్తి నేరుగా చట్టబద్ధమైన Class 1 వారసులకే చేరుతుందని కోర్టు తెలిపింది. ఈ జాబితాలో తండ్రి ఉంటారు; మనవడికి అందులో నేరుగా హక్కు ఉండదని పేర్కొంది.

ఈ కేసు తమిళనాడులో మొదలైంది. 1997లో చెన్నైకి చెందిన ఒక వ్యక్తి తన తండ్రికి తాత నుంచి వచ్చిన ఆస్తిలో తనకు చట్టబద్ధమైన వాటా కావాలని కోరారు. తన అనుమతి లేకుండా తండ్రి ఆస్తిని అమ్మారని ఆయన కోర్టులో సవాల్ చేశారు. ఈ పిటిషన్‌ను మద్రాస్ హైకోర్టు కొట్టివేసింది. ఆ తీర్పును సవాల్ చేస్తూ ఆయన సుప్రీంకోర్టుకు అపీల్ చేశారు.

తాత నుంచి తనకు వచ్చిన ఆస్తిపై తండ్రికి పూర్తి వ్యక్తిగత హక్కులు ఉంటాయని కోర్టు వివరించింది. ఆ ఆస్తిని అమ్మాలా, మరొకరికి బదిలీ చేయాలా అనేది తండ్రి వ్యక్తిగత నిర్ణయమేనని తెలిపింది. ఆ విక్రయాన్ని లేదా లావాదేవీని మనవడు కోర్టులో సవాల్ చేయలేరని ధర్మాసనం క్లారిటీ ఇచ్చింది. మద్రాస్ హైకోర్టు తీర్పును సమర్థిస్తూ ఈ అపీల్‌ను సుప్రీంకోర్టు పూర్తిగా కొట్టివేసింది.

దేశవ్యాప్తంగా వివిధ కోర్టుల్లో పెండింగ్‌లో ఉన్న వేలాది ఆస్తి వివాదాలకు ఈ తీర్పు మార్గదర్శకంగా ఉంటుందని న్యాయ నిపుణులు అభిప్రాయపడుతున్నారు. తాత ఆస్తి పంపకంలో కుటుంబ సభ్యుల మధ్య వచ్చే చట్టపరమైన చిక్కులకు ఇది చెక్ పెడుతుందని వారు చెబుతున్నారు.