96 ఏళ్ల తర్వాత మాస్కోలో ఠాగూర్ అరుదైన చిత్రాల ప్రదర్శన

రవీంద్రనాథ్ ఠాగూర్ గీసిన అరుదైన చిత్రాల ప్రదర్శన 96 ఏళ్ల తర్వాత మాస్కోలో ప్రారంభమైంది. శాంతినికేతన్‌లోని విశ్వభారతీ విశ్వవిద్యాలయంలోని రవీంద్ర భవన్ మ్యూజియం నుంచి 59 చిత్రాలు ఈ ప్రదర్శనలో ఉన్నాయి.

ఈ ప్రదర్శనకు "ది వరల్డ్ ఇన్ ఏ సింగిల్ నెస్ట్ ఫాలోయింగ్ ది వే ఆఫ్ ఠాగూర్" అని పేరు పెట్టారు. చివరిసారి 1930లో మాస్కోలో ఠాగూర్ చిత్రాలు ప్రదర్శనకు వచ్చాయి. అప్పుడు స్వయంగా ఠాగూర్ హాజరయ్యారు. ఆ తర్వాత చిత్రాలు పాడైపోకుండా భద్రపరిచేందుకు వీటిని విదేశాలకు పంపలేదు.

విశ్వభారతీ విశ్వవిద్యాలయం, నేషనల్ గ్యాలరీ ఆఫ్ మోడర్న్ ఆర్ట్ మాస్కో, భారత రాయబార కార్యాలయం సంయుక్తంగా ఈ ప్రదర్శన ఏర్పాటు చేశాయి. ఠాగూర్ కళాఖండాలు భారత రష్యాల సాంస్కృతిక బంధాన్ని మరింత బలోపేతం చేస్తాయని విశ్వభారతీ వర్గాలు ఆశాభావం వ్యక్తం చేశాయి.