తిరుపతిలో టీడీపీ ఇంటింటికీ ప్రచారం: ప్రజలు సంతృప్తి, సమస్యలు వెల్లడి

తిరుపతి: టీడీపీ తిరుపతి ఇంచార్జ్ జేపీ శ్రీనివాస్ ఆధ్వర్యంలో తిమ్మినాడపల్లెలో ఇంటింటికీ ప్రచార కార్యక్రమం నిర్వహించారు. ఈ సందర్భంగా ప్రజలు తాము పొందుతున్న సంక్షేమ పథకాలతో సంతృప్తి వ్యక్తం చేస్తూనే స్థానిక సమస్యలను లేవనెత్తారు.

ప్రజలు దీపం, తల్లికి వందనం, ఉచిత బస్సు, ₹3 అన్న క్యాంటీన్, పెన్షన్ల పెంపు వంటి పథకాలు తమకు ఉపయోగకరంగా ఉన్నాయని చెప్పారు. చంద్రబాబు నాయుడు, లోకేశ్, పవన్ కల్యాణ్ పేరిట వారు కృతజ్ఞత తెలిపారు.

అయితే ఇదే సందర్భంగా ప్రజలు పలు స్థానిక సమస్యలను కూడా ఇంచార్జ్ దృష్టికి తీసుకెళ్లారు. వర్షం నీటి పారుదల సమస్య, డ్రైనేజీలు, సీసీ రోడ్లు, నీటి సమస్యలతో పాటు స్మసానం సమస్య ప్రధానంగా ఎత్తిచూపారు. అదనంగా సమీపంలో వన్యప్రాణులు రావడంపైనా ఆందోళన వ్యక్తం చేశారు.

ఈ సమస్యలపై జేపీ శ్రీనివాస్ స్పందిస్తూ, అధికారులతో మాట్లాడామని, డ్రైనేజీలు, రోడ్లు, నీటి సమస్యలు త్వరలో పరిష్కరిస్తామని హామీ ఇచ్చారు. స్మసానం సమస్యపై రెవెన్యూ మంత్రి, కలెక్టర్, ఆర్డీవో సమక్షంలో చర్చించామని, దాన్ని కూడా త్వరగా పరిష్కరిస్తామని చెప్పారు. వన్యప్రాణుల బెడదపై ఫారెస్ట్ అధికారులతో మాట్లాడి, ఆ ప్రాంతంలో ట్రెంచీలు తవ్వుతూ, కంచె వేస్తామని వివరించారు.

కాగా, రాష్ట్రవ్యాప్తంగా సంక్షేమ పథకాలను విస్తరించేందుకు ప్రభుత్వం చర్యలు తీసుకుంటోంది. తల్లికి వందనం పథకాన్ని కుటుంబంలోని అందరు పిల్లలకూ వర్తింపజేసే అంశంపై ప్రభుత్వం ఆలోచిస్తోంది. మరింత మందికి పింఛన్లు ఇవ్వాలని ప్రజలు కోరుతున్నట్లు శ్రీనివాస్ తెలిపారు.