హైదరాబాద్‌లో అల్ప, మధ్యతరగతి కుటుంబాలకు సొంతిల్లు కల సాకారం చేసే దిశగా తెలంగాణ ప్రభుత్వం అడుగులు

గ్రేటర్ హైదరాబాద్ మున్సిపల్ కార్పొరేషన్ (GHMC) పరిధిలో అల్పాదాయ, మధ్యతరగతి వర్గాలకు సరసమైన ధరలకు ఇళ్లు అందించేందుకు తెలంగాణ ప్రభుత్వం ప్రాథమిక ప్రణాళిక సిద్ధం చేస్తోంది.

హౌసింగ్ బోర్డు అధికారులు ఇప్పటికే GHMC పరిధిలోని 24 నియోజకవర్గాలను పరిశీలించారు. కూకట్ పల్లి, జూబ్లీ హిల్స్, కుత్బుల్లాపూర్, బాచుపల్లి, అల్వాల్, ఇబ్రహీంపట్నం తదితర 15 ప్రాంతాల్లో స్థలాలు గుర్తించినట్లు సమాచారం. తొలి దశలో 12 వేల ఇళ్ల నిర్మాణం లక్ష్యంగా ప్రభుత్వం పైలట్ ప్రాజెక్ట్ అమలుకు సిద్ధమవుతోంది. డిమాండ్‌ను బట్టి తర్వాత మరిన్ని ప్రాజెక్టులకు విస్తరించే అవకాశం ఉంది.

ఈ ప్రణాళిక ప్రకారం అల్పాదాయ వర్గాలకు భూమి విలువ పూర్తిగా మాఫీ చేస్తారు. అదనంగా ఫ్లాట్‌కు ₹5 లక్షల వరకు సబ్సిడీ ఇవ్వాలని భావిస్తున్నారు. మధ్య ఆదాయ వర్గాలకు ఇళ్ల ధరను కేవలం నిర్మాణ వ్యయం ఆధారంగా మాత్రమే నిర్ణయించాలని ప్రభుత్వం భావిస్తోంది. దీనివల్ల మార్కెట్ ధర కంటే తక్కువకే ఫ్లాట్లు అందుబాటులోకి వస్తాయి.

గతంలో నగర శివార్లలో ఇళ్ల నిర్మాణ ప్రాజెక్టులు చేపట్టినా, ఉద్యోగాలు, విద్య, రవాణా సౌకర్యాలకు దూరంగా ఉండటంతో ఆశించిన స్పందన రాలేదు. ఆ అనుభవంతో ఈసారి నేరుగా నగర పరిధిలోనే ప్రాజెక్టులు చేపట్టాలని నిర్ణయించారు. ప్రాజెక్టుల అమలుకు ప్రభుత్వ-ప్రైవేట్ భాగస్వామ్యం (PPP) విధానం, బ్యాంకు రుణాలు, లబ్ధిదారుల భాగస్వామ్యం వంటి ఎంపికలను అధికారులు పరిశీలిస్తున్నారు. సమగ్ర ప్రాజెక్ట్ నివేదిక (DPR) తయారీ జరుగుతోంది.

నగరంలోనే తక్కువ ధరకు ఇల్లు లభించడం వల్ల వేలాది కుటుంబాలు ప్రయోజనం పొందుతాయని, అదేసమయంలో నిర్మాణ రంగానికి ఊతం లభిస్తుందని నగర నిపుణులు అభిప్రాయపడుతున్నారు.