తెలంగాణలో ఫ్యామిలీ రిజిస్టర్ సర్టిఫికెట్: రేషన్ కార్డు ఆధారంగా కుటుంబాలకు ప్రత్యేక గుర్తింపు

తెలంగాణ ప్రభుత్వం ప్రతి కుటుంబానికి ఒకే గుర్తింపు కల్పించే ఫ్యామిలీ రిజిస్ట్రేషన్ సర్టిఫికెట్ (FRC) తీసుకురానుంది. ఇందుకు సంబంధించి ప్రభుత్వం ఇటీవల GO జారీ చేసింది.

ఈ కొత్త విధానంలో, రేషన్ కార్డు, ఆధార్ ఆధారంగా కుటుంబ సభ్యుల వివరాలన్నీ ఒకే సర్టిఫికెట్లో నమోదు అవుతాయి. కుటుంబ పెద్ద, సభ్యుల పేర్లు, సంబంధాలు, చిరునామా వంటి సమాచారం ఇందులో ఉంటుంది. దీంతో ప్రభుత్వ కార్యాలయాల్లో విడివిడిగా పత్రాలు సమర్పించాల్సిన అవసరం తగ్గుతుందని అధికారులు తెలిపారు. ఆస్తి పంపకాలు, ప్రభుత్వ పథకాల దరఖాస్తుల సమయంలో ఈ సర్టిఫికెట్ ఉపయోగపడుతుందని అధికారులు చెబుతున్నారు.

ఇప్పటికే ఉత్తరాఖండ్, ఉత్తరప్రదేశ్, బీహార్ రాష్ట్రాల్లో ఫ్యామిలీ రిజిస్టర్ విధానం అమల్లో ఉంది. జపాన్, జర్మనీ, ఇటలీ, దక్షిణ కొరియా తదితర దేశాల్లోనూ ఇలాంటి వ్యవస్థ ఉంది.

మాజీ ఐఏఎస్ అధికారి చిరంజీవులు ఈ విధానం ప్రజలకు ప్రభుత్వ సేవలు వేగంగా అందేలా చేస్తుందని అభిప్రాయపడ్డారు. దరఖాస్తు ప్రక్రియ, అవసరమైన పత్రాలు, అర్హతలు, తప్పుల సవరణ వంటి అంశాలపై గ్రామ/వార్డు స్థాయిలో అవగాహన కార్యక్రమాలు నిర్వహించాలని సూచించారు.