ధాన్యం తరలించిన 15 రోజులకూ ట్రక్ షీట్, ఓటీపీ రాని రైతులు: ఆందోళన

తెలంగాణలోని కొన్ని ప్రభుత్వ ధాన్యం కొనుగోలు కేంద్రాల నుంచి ధాన్యం తరలించిన పలువురు రైతులకు 15 రోజులు దాటినా ట్రక్ షీట్లు అందడం లేదు. చెల్లింపునకు సంబంధించిన ఓటీపీ కూడా రావడంలేదని రైతులు ఆందోళన వ్యక్తం చేస్తున్నారు.

సిద్దిపేట జిల్లా రేబర్తికి చెందిన పీఏసీఎస్ కొనుగోలు కేంద్రం నుంచి నాలుగు లారీల ధాన్యం తరలించి 12 రోజులు గడిచినా ట్రక్ షీట్, ఓటీపీ రాలేదు. ఈ ధాన్యం ఏ మిల్లుకు వెళ్లిందో, నిజంగా మిల్లుకు చేరిందో లేదో తెలియని పరిస్థితి నెలకొంది. ఇది సిరిసిల్ల ఘటన తర్వాత మరింత ఆందోళన కలిగిస్తోంది.

సాధారణంగా కొనుగోలు కేంద్రంలో ధాన్యం తూచి లారీల్లో ఎక్కించిన తర్వాత ఒకట్రెండు రోజుల్లో ట్రక్ షీట్ జారీ చేయాలి. ఆ తర్వాత రైతుకు ఓటీపీ వస్తుంది. మరో రెండు మూడు రోజుల్లో ఖాతాలో డబ్బులు జమ కావాలి. కానీ ఇక్కడ పూర్తి విరుద్ధంగా కొంతమందికి ఓటీపీ రాలేదు, కొందరికి ఓటీపీ వచ్చినా డబ్బులు పడలేదు.

అదనపు ధాన్యాన్ని మిల్లులకు తరలించిన తర్వాత అనుమతి ఇవ్వడంలో సివిల్ సప్లై అధికారులు నిర్లక్ష్యంగా వ్యవహరిస్తున్నట్లు విమర్శలు ఉన్నాయి. తమకు అనుకూలంగా ఉండే మిల్లులకు ఎక్కువ ధాన్యం కేటాయించడం, వ్యతిరేక మిల్లులకు తక్కువ కేటాయించడం వంటి ఆరోపణలు కూడా వెలువడుతున్నాయి. అధికారుల నిర్లక్ష్యంతో రైతులు ఇబ్బంది పడాల్సి వస్తోందని రైతు వర్గాలు ఆవేదన వ్యక్తం చేస్తున్నాయి.