తెలంగాణ: 3,800 ఉద్యోగాల భర్తీకి నోటిఫికేషన్ విడుదల; నెలకు 3 నోటిఫికేషన్ల లక్ష్యం

తెలంగాణ ప్రభుత్వం రాష్ట్రంలో 3,800 ఉద్యోగాల భర్తీకి నోటిఫికేషన్ విడుదల చేసింది. 35 శాఖల్లో ఖాళీగా ఉన్న ఈ పోస్టులకు ఆర్థిక శాఖ అనుమతి ఇచ్చింది. ఈ నెలలో మొత్తం 5-6 నోటిఫికేషన్లు ఇవ్వనున్నట్లు టీజీపీఎస్సీ చైర్మన్ బుర్ర వెంకటేశ్ తెలిపారు.

హైదరాబాద్‌లోని టీజీపీఎస్సీ కార్యాలయంలో సోమవారం నిర్వహించిన విలేకరుల సమావేశంలో ఆయన మాట్లాడుతూ, ఏ నోటిఫికేషన్ ఇచ్చినా ఏడాదిలోపు నియామక ప్రక్రియ పూర్తి చేయాలనే లక్ష్యంగా పెట్టుకున్నామన్నారు. యూపీఎస్సీ తరహాలో అభ్యర్థులకు మార్గ నిర్దేశం చేసే ‘ప్రతిభా భారతి’ పోర్టల్‌ని 2-3 నెలల్లో అందుబాటులోకి తీసుకురానున్నట్లు చెప్పారు.

ఇవాళ విడుదల చేసిన నోటిఫికేషన్లలో డిప్యూటీ డీఈఓ, డైట్ లెక్చరర్లు, ఏఎస్‌ఓ, ఫారెస్ట్ బీట్ ఆఫీసర్ (1393 పోస్టులు) తదితర పోస్టులు ఉన్నాయి. గ్రూప్‌-వారీగా దశలవారీగా భర్తీ చేస్తామని, ఇకపై 90% పరీక్షలు కంప్యూటర్ బేస్డ్ ఆన్‌లైన్‌లోనే నిర్వహిస్తామని బుర్ర వెంకటేశ్ స్పష్టం చేశారు. దీనివల్ల ప్రశ్నపత్రాల లీకేజీకి అవకాశం ఉండదన్నారు.

సింగిల్ పరీక్ష ఉన్న పోస్టులకు 3-6 నెలల్లో, మెయిన్స్ ఉంటే గరిష్ఠంగా 9 నెలల్లో నియామకాలు పూర్తి చేస్తామని ఆయన తెలిపారు. నిరుద్యోగులు తమ వన్‌టైమ్ రిజిస్ట్రేషన్ (ఓటీఆర్) వివరాలను అప్‌డేట్ చేసుకోవాలని కోరారు. రాష్ట్రంలో 32 లక్షల మంది ఓటీఆర్ నమోదు చేసుకున్నప్పటికీ, క్రమం తప్పకుండా వివిధ పోస్టులకు 7 లక్షల మంది మాత్రమే దరఖాస్తు చేసుకుంటున్నారని వివరించారు.

ప్రతి నెలా 3 నోటిఫికేషన్ల చొప్పున విడుదల చేస్తామని, ఈ నెలలో మరో 3 నోటిఫికేషన్లు కూడా వచ్చే అవకాశం ఉందని టీజీపీఎస్సీ చైర్మన్ వెల్లడించారు.