తెలంగాణలో 13వ తేదీ వరకు భారీ వర్షాలు; 60 కి.మీ. వేగంతో ఈదురు గాలులు

తెలంగాణలో ఇవాళ నుంచి 13వ తేదీ వరకు భారీ వర్షాలు కురిసే అవకాశం ఉందని హైదరాబాద్ వాతావరణ కేంద్రం హెచ్చరిక జారీ చేసింది. బంగాళాఖాతంలో ఏర్పడిన అలజడి కారణంగా రాష్ట్రంలోని పలు జిల్లాల్లో ఉరుములు, మెరుపులు, పిడుగులతో కూడిన వర్షాలు కురుస్తాయని తెలిపింది.

ఈ సమయంలో గంటకు 40 నుంచి 60 కిలోమీటర్ల వేగంతో ఈదురు గాలులు వీచే అవకాశం ఉందని, దీంతో పాత భవనాలు, రేకుల ఇళ్లు ధ్వంసం కావచ్చని హెచ్చరించింది. ఆకాశం మేఘావృతమై సాయంత్రం నుంచి ఎక్కువ జల్లులు పడే అవకాశం ఉంది.

నిన్న రాత్రి మెడ్చల్, సిద్దిపేట, భువనగిరి జిల్లాల్లో కుండపోత వర్షాలు కురిశాయి. జగిత్యాల, కామారెడ్డి, మెదక్, సంగారెడ్డి జిల్లాల్లో తేలికపాటి నుంచి మోస్తరు వర్షాలు నమోదయ్యాయి. ఇవాళ ఉదయం నిజామాబాద్ జిల్లా ఆర్మూర్, కామారెడ్డి ప్రాంతాల్లో భారీ వర్షం కురిసింది. నిర్మల్, మంచిర్యాల, పెద్దపల్లి, కొమరంభీం, జయశంకర్ భూపాలపల్లి, ములుగు, కరీంనగర్ జిల్లాల్లో మోస్తరు వర్షం కురుస్తోంది.

ప్రజలు అప్రమత్తంగా ఉండాలని, ముఖ్యంగా లోతట్టు ప్రాంతాల వారు అవసరం లేకుండా బయటకు వెళ్లవద్దని అధికారులు సూచించారు. వాగులు దాటడం, చెరువుల వద్దకు వెళ్లడం చేయవద్దని హెచ్చరించారు. రైతులు, ప్రయాణికులు తాజా వాతావరణ సమాచారాన్ని ఎప్పటికప్పుడు చూసి జాగ్రత్తలు తీసుకోవాలన్నారు. హైదరాబాద్ నగరంలో కూడా భారీ వర్షాలు కురిసే అవకాశం ఉందని హెచ్చరించారు.

గత పది రోజుల క్రితం కురిసిన భారీ వర్షాలతో చెరువులు నిండి, వాగులు ఉద్ధృతంగా ప్రవహిస్తున్నాయి. గోదావరి, కృష్ణా నదులు భారీగా ప్రవహిస్తున్నాయి. రాబోయే మూడు నాలుగు రోజులు తెలంగాణ వ్యాప్తంగా వర్షాలు కొనసాగే అవకాశం ఉందని వాతావరణ శాఖ తెలిపింది.