అధిక దిగుబడినిచ్చే మధ్యకాలిక వరి రకాలు — రైతులకు శాస్త్రవేత్తల సూచనలు

వరంగల్ ప్రాంతీయ వ్యవసాయ పరిశోధన స్థానం శాస్త్రవేత్త సతీష్ చంద్ర తెలంగాణ రైతులకు మధ్యకాలిక వరి రకాల గురించి వివరాలు తెలిపారు. బోర్లు, బావులు, చెరువుల నీటిపై ఆధారపడే ప్రాంతాలకు ఈ రకాలు అనుకూలమని చెప్పారు. జూన్ 15 తర్వాత కూడా నారు పోసుకోవచ్చని, 135 రోజుల్లో పంట చేతికొస్తుందని పేర్కొన్నారు.

మధ్య తెలంగాణ, ఉత్తర తెలంగాణలో ఎక్కువగా సాగవుతున్న DRR 14 రకం ఎకరానికి 26 నుండి 30 క్వింటాళ్ల దిగుబడి ఇస్తుంది. జగిత్యాల పరిశోధన స్థానం విడుదల చేసిన JGL 11727 (ప్రాణహిత) కూడా 26 నుండి 30 క్వింటాళ్ల దిగుబడి సామర్థ్యం కలిగి ఉంది. ఇది BPT 524 పోలిన అన్నం నాణ్యత కలిగి, చీడపీడలను కొంతవరకు తట్టుకుంటుంది.

జగిత్యాల నుండి విడుదలైన JGL 27356 అతి సన్నగింజ రకం. జై శ్రీరాం రకానికి ప్రత్యామ్నాయంగా దీన్ని అభివృద్ధి చేశారు. ఇది ఎకరానికి 28 నుండి 30 క్వింటాళ్ల దిగుబడి ఇస్తుంది. పొట్టకులు తెగులు, గింజమచ్చ తెగులను కొంతవరకు తట్టుకుంటుంది.

జగిత్యాల నుండి విడుదలైన JGL 28545 సన్నగింజ రకం అగ్గి తెగులు, పొట్టకు తెగులను తట్టుకుంటుంది. ఇది 26 నుండి 30 క్వింటాళ్ల దిగుబడి ఇస్తుంది.

వరంగల్ పరిశోధన స్థానం విడుదల చేసిన 915 (దొడ్డుగింజ) రకం 28 నుండి 32 క్వింటాళ్ల అత్యధిక దిగుబడి ఇస్తుంది. దోమకాటు, పొట్టకుల తెగులు, Rice Tungro వైరస్‌ను తట్టుకుంటుంది. అయితే ఈ రకానికి పిలక వేసే గుణం తక్కువ కాబట్టి, దగ్గర దగ్గరగా నాట్లు వేయాలని శాస్త్రవేత్తలు సూచించారు.

వరంగల్ స్థానం విడుదల చేసిన WGL 347 (సోమనాథ్) చవుడు పొలాలకు అనుకూలంగా ఉంటుంది. 26 నుండి 28 క్వింటాళ్ల దిగుబడి ఇస్తుంది. రాజేంద్రనగర్ నుండి విడుదలైన RNR 28361 దొడ్డుగింజ రకం 28 నుండి 32 క్వింటాళ్ల దిగుబడి సామర్థ్యం కలిగి ఉంది.

కూనారం పరిశోధన స్థానం మూడో దశలో అభివృద్ధి చేస్తున్న KNM 7715 అతి సన్నగింజ రకం 26 నుండి 30 క్వింటాళ్ల దిగుబడి ఇస్తుంది. అగ్గి తెగులు, పొట్టకులు తెగులు, గింజమచ్చ తెగులు, bacterial leaf blight మరియు సుడిదోమను కొంతవరకు తట్టుకుంటుంది.