తెలంగాణలో నేటి నుంచి కనీస వేతనాలు పెంపు: 1.1 కోట్ల మంది కార్మికులకు ప్రయోజనం

తెలంగాణ రాష్ట్రంలో నేటి (గురువారం) నుంచి కనీస వేతనాలు పెరిగాయి. రాష్ట్రవ్యాప్తంగా 1.1 కోట్ల మంది కార్మికులకు ఈ పెంపు వర్తిస్తుంది. కార్మిక శాఖ ఈ మేరకు ఉత్తర్వులు జారీ చేసింది.

వివిధ షెడ్యూల్డ్ రంగాలకు వేర్వేరు వేతనాలు కాకుండా అందరికీ ఒకే విధమైన వేతనాలు వచ్చేలా ప్రభుత్వం ఏకీకృత నమూనా ప్రవేశపెట్టింది. నగరపాలికలను జోన్-1గా, మున్సిపాలిటీలను జోన్-2గా, గ్రామాలు, ఇతర ప్రాంతాలను జోన్-3గా విభజించారు. నైపుణ్య స్థాయిల వారీగా కొత్త కనీస వేతనాలు ఈ విధంగా ఉన్నాయి: - జోన్-1: అన్స్కిల్డ్ – రూ.16,000, సెమీ స్కిల్డ్ – రూ.17,000, స్కిల్డ్ – రూ.18,500, హై స్కిల్డ్ – రూ.20,000. - జోన్-2: అన్స్కిల్డ్ – రూ.15,000, సెమీ స్కిల్డ్ – రూ.16,000, స్కిల్డ్ – రూ.17,500, హై స్కిల్డ్ – రూ.19,000. - జోన్-3: అన్స్కిల్డ్ – రూ.14,000, సెమీ స్కిల్డ్ – రూ.15,000, స్కిల్డ్ – రూ.16,500, హై స్కిల్డ్ – రూ.18,000.

కొత్తగా హై స్కిల్డ్ కేటగిరీని చేర్చడంతో పాటు 10 కొత్త రంగాలు కనీస వేతనాల పరిధిలోకి వచ్చాయి. వీటిలో ఈ-కామర్స్, కొరియర్ సర్వీసులు, దేవాలయాలు, మసీదులు, చర్చీలు, సామాజిక సంస్థల కార్యాలయాలు, పబ్లిక్ పార్కులు, వాటర్ థీమ్ పార్కులు, వినోద పార్కులు, మొబైల్ టవర్ మెయింటనెన్స్, కేబుల్ టీవీ నెట్వర్క్ రంగాలు, హస్తకళల సంస్థలు, బోర్వెల్ డ్రిల్లింగ్ నిర్వహణ, రెడీ మిక్స్ కాంక్రీట్ యూనిట్లు, అల్యూమినియం/టిన్ ఉత్పత్తుల యూనిట్లు, ఎల్పీజీ స్టోరేజ్, పంపింగ్ ఏజెన్సీలు ఉన్నాయి. మొత్తం ఉపాధి రంగాల సంఖ్య 77కు చేరింది.

14 ఏళ్ల తర్వాత రాష్ట్రంలో వేతనాలు పెరగడం ఇదే తొలిసారి. ప్రస్తుతం కార్మికులు పొందుతున్న వేతనాలు కొత్త కనీస వేతనాల కంటే ఎక్కువగా ఉంటే, ఆ ఎక్కువ వేతనాలనే కొనసాగించాలని ఆదేశాలు స్పష్టం చేశాయి. రోజుకు 8 గంటలకు మించి పని చేస్తే అదనపు గంటల వేతనం చెల్లించాలి. వారాంతపు, పబ్లిక్ హాలిడేలపు పనికి రెండింతల వేతనం ఇవ్వాలి. చేసే పని సమానంగా ఉంటే లింగ వివక్ష లేకుండా వేతనాలు చెల్లించాలి. గుత్తేదారులు లేదా సర్వీస్ ఏజెన్సీల ద్వారా కార్మికులు పని చేస్తే, వారికి కనీస వేతనాలు చెల్లించే బాధ్యత ప్రధాన యజమానిపై ఉంటుంది.