తెలంగాణను డ్రగ్స్ రహిత రాష్ట్రంగా మారుస్తామని మంత్రుల ప్రతిజ్ఞ

హైదరాబాద్‌లోని శిల్పకళా వేదికలో ఈగల్ టీం నిర్వహించిన యాంటీ డ్రగ్స్ అవగాహన కార్యక్రమంలో డిప్యూటీ సీఎం భట్టి విక్రమార్క, మంత్రి పొన్నం ప్రభాకర్ పాల్గొన్నారు. ఈ సందర్భంగా వారు ప్రసంగిస్తూ తెలంగాణను పూర్తిగా డ్రగ్స్ రహిత రాష్ట్రంగా మార్చే లక్ష్యంగా చర్యలు తీసుకుంటామని స్పష్టం చేశారు.

డిప్యూటీ సీఎం భట్టి విక్రమార్క మాట్లాడుతూ, డ్రగ్స్ బారిన పడి యువత తమ విలువైన జీవితాన్ని నాశనం చేసుకోవద్దని సూచించారు. రాష్ట్ర భవిష్యత్తును నాశనం చేయాలని చూస్తే ఎంతటి వారినైనా ఉపేక్షించబోమని హెచ్చరించారు.

మంత్రి పొన్నం ప్రభాకర్ మాట్లాడుతూ, ప్రతి యువకుడు 'నో టు డ్రగ్స్' ప్రతిజ్ఞ తీసుకోవాలని పిలుపునిచ్చారు. ఎక్కడైనా డ్రగ్స్ వినియోగించినట్టు తెలిస్తే పోలీసులకు సమాచారం ఇవ్వాలన్నారు. సినీ నటులు, క్రీడాకారులు, వివిధ రంగాల ప్రముఖులు డ్రగ్స్ వ్యతిరేక ప్రచారం చేయాలని కోరారు.

రాజన్న సిరిసిల్ల జిల్లాలోని సిరిసిల్ల పట్టణంలో జరిగిన యాంటీ డ్రగ్స్ ర్యాలీలో విప్పు ఆది శ్రీనివాస్ పాల్గొన్నారు. రాష్ట్రాన్ని గంజాయి రహితంగా మారుస్తామని, సిరిసిల్లలో డి-ఎడిక్షన్ సెంటర్ ఏర్పాటు చేస్తామని తెలిపారు. ఈగల్ టీం డ్రగ్స్ ముఠాలపై ఉక్కుపాదం మోపుతుందని చెప్పారు.